Ֆրանսիան հեշտացնում է վիզային ռեժիմը Ռուսաստանի հետ. Բա ո՞ւր մնաց Հայաստանը

Այսoրվանից Ռուսաստանի քաղաքացիներին Ֆրանսիան վիզա կտրամադրի ոչ ավելի, քան 2 օրվա ընթացքում: Այսպիսի որոշում են կայացրել Ֆրանսիայի իշխանությունները: Նշենք, որ նման մտադրության մասին հայտարարել էր Ֆրանսիայի վարչապետ Էդուարդ Ֆիլիպը, դեռ ամռանը` նշելով, որ տուրիզմի զարգացման համար Ֆրանսիան պետք է առավել հեշտացնի իր վիզաների տրամադրումը` մի շաշրք երկրներին, որոնց մեջ է մտնում նաև Ռուսաստանը: 

Այսօր շատերն են խոսում, որ Հայաստանը պետք է ակտիվորեն համագործակցի Եվրոմիության հետ, ընդլայնի կապերը, սակայն այնպիսի տպավորություն է ստեղծվում, որ այս յուրօրինակ քաղաքական սիրավեպը միակողմանի է, քանզի Եվրոմիությունը պատժամիջոցներ է կիրառում Ռուսաստանի վրա, բայցև միաժամանակ իր շահերից ելնելով դյուրացնում է քաղաքացիների շփումները` հենց Ռուսաստանի հետ, այլ ոչ թե Հայաստանի, որը Եվրոպացիներին, կարելի է ասել, չի հետաքրքրում: 

Իսկ ինչո՞ւ է այդպես, կհարցնի ընթերցողը: Այդ հարցին պատասխանել է հենց Ֆրանսիայի վարչապետը, ով նշել է, որ Ռուսաստանին տրամադրել է այս արտոնյալ ռեժիմը այն բանի պատճառով, որ Ռուսաստանն այն երկրներից է, որն ամենաշատ զբոսաշրջիկների հոսքն է ապահովում` դեպի Ֆրանսիա` զարգացնելով Ֆրանսիայի զբոսաշրջության ոլորտը: Մինչդեռ փոքր Հայաստանը այդպիսի հնարավորություն չունի, և ուրեմն պետք է շարունակի զբաղվել միակողմանի քաղաքական սիրավեպով:

Հակոբ Կարապետյան