ԱՄՆ-ում փնտրում էին ռուսական հետք, սակայն ստացան` ուկրաինական. Տեսանյութ

Եվ այսպես, Միացյալ Նահանգների սենատի կողմից նշանակված հատուկ դատախազ Ռոբերտ Մյուլլերը հրապարակել է իր հետաքննության առաջին արդյունքները: Թրամպի նախընտրական արշավին մոտ կանգնած նախկին խորհրդական Ջորջ Պապադոպուլոսը արդեն խոստովանել է իր մեղքը, որ նախընտրական արշավի ժամանակ համագործակցել է ռուսների հետ, սակայն սույն գործիչը էական դեր չէր կատարում Թրամպի նախընտրական արշավում: Ավելին, էական բացահայտումը այն է, որ պարզվել է` արտասահմանցիների ակտիվ լոբինգ է իրականացրել Թրամպի նախընտրական արշավի շտաբի պետ Փոլ Մանաֆորտը և նրա գործընկեր Ռիչարդ Գեյթսը: Սակայն Մյուլլերը պարզել է, որ սույն գործիչները լոբինգ են արել ոչ թե Ռուսաստանի, այլ` Ուկրաինայի շահերը:

Պարզվել է, որ 4 – 5 տարի առաջ Ուկրաինայի նախկին նախագահ Յանուկովիչը սույն գործիչներին պատվիրել է` Միացյալ Նահանգներում պատշաճ մակարդակով աջակցել Ուկրաինային: Այդ ժամանակ Յանուկովիչը պատրաստվում էր եվրոասոցացման գործընթացին և Ռուսաստանի հետ հակադրման հարցում անչափ անհրաժեշտ էր Միացյալ Նահանգների աջակցությունը: Այս համագործակցության ընթացքում հատուկ դատախազ Մյուլլերը բացահայտել է նաև փողերի լվացման դրվագներ, որն էլ հիմք է հանդիսանում սույն գործիչներին մեղադրանք ներկայացնելու համար:
Փաստորեն, երկարատև հետաքննությունից հետո պարզվել է, որ Թրամպի շրջապատը լոբիստական աշխատանքներ է տարել ոչ թե Ռուսաստանի, այլ` Ուկրաինայի շահերի համար:
Ինչ վերաբերվում է բուն ռուսական շահերին, ապա այստեղ հետաքննության արդյունքները չնչին են: Քանզի բացի սոցցանցերում ակտիվ աշխատանքներից, Մյուլլերը որևէ էական ռուսական հետք չի հայտնաբերել:

Zham.am