Հետախուզման մեջ գտնվող անձը ինչպե՞ս է կարողացել 1 տոննա կոկաին ներմուծել ՀՀ․ Խամոյանը՝ իշխանությանը. Տեսանյութ

«Դեռ տարեսկզբից այս բարձր ամբիոնից ահազանգել եմ մեր երկրի սահմանների ներսում ահագնացող մի չարիքի մասին, որը պակաս սպառնալիք չէ նրանից, ինչ տեղի է ունենում մեր երկրի սահմանների շուրջ։ Խոսքը թմրանյութերի ապօրինի շրջանառության մասին է, այն սարսափելի վիճակագրության, որն օր-օրի ավելի սարսափելի է դառնում։ Ամիսներ առաջ արձանագրել եմ, որ այս խնիդրը չկանգնեցնելու դեպքում մենք կանգնելու ենք ազգային անվտանգության նոր սպառնալիքի առջև։ Հիմա ցավով պետք է արձանագրեմ, որ պետությունը այս պահի դրությամբ որևէ ռեալ, կտրուկ քայլ չի ձեռնարկել այս խնդիրը գոնե լուծել փորձելու համար»,- ԱԺ-ում հայտարարեց «Հայաստան» խմբակցության պատգամավոր Ագնեսա Խամոյանը։

Փոխարենը, ըստ նրա, Հայաստանը հայտնվել է միջազգային մամուլի ուշադրության կենտրոնում Էկվադորից շուրջ 3 տոննա կոկաին Իտալիայում առգրավված լինելու մասին լուրով, որը պետք է բերվեր Հայաստան։ «Շուրջ 10 օր անցել է, մինչ այս պահը որևէ հավելյալ տեղեկատվություն չկա, թե ինչ մեխանիզմով է տեղի ունեցել այդ բեռի ներմուծումը, ովքեր են եղել դրա գործուն մասնակիցները, ովքեր են եղել Հայաստան բեռի տեղափոխման երաշխավորները, տանիքները։

Այս պահի դրությամբ որևէ հրապարակում տեղի չի ունեցել։ Ես չեմ հավատում, թե դուք էնքան միամիտ եք, որ կարծում եք՝ հնարավոր է նման գործարք որևէ երկրում իրականացնել առանց իշխանության բարձրագույն ներկայացուցիչների մասնակցության»,- ասաց Ագնեսա Խամոյանը։ Նա անդրադարձավ իշխանական լատվամիջոցների հրապարակումներին, թե բանանի հետ «ձեռքի հետ» կոկաին ներմուծող ընկերությունը պատկանում է ԴԱՀԿ նախկին պետ Մհրան Պողոսյանին, ով գտնվում է հետախուզման մեջ։ Խամոյանն ասաց․ «Սա խոսում է ձեր իշխանության չգոյության մասին, եթե հետախուզման մեջ գտնվող անձնավորությունը կարողանում է իր ընկերությունով մեկ տոննա կոկաին ներմուծել Հայաստան, 2,7-ն էլ գտնվում է Իտալիայում»։

Ագնեսա Խամոյանն ասաց, որ եթե հավելյալ տեղեկություններ չհաղորդվեն, դա կփաստի իշխանության մոտ գտնված անձանց ներգրավվածությունը գործընթացին։

Մանրամասն՝ տեսանյութում։