ՀՌՕ ռազմակայանի ավիացիոն ստորաբաժանման հրամանատարական կազմը թռիչքներ կիրականացնի ՀՀ-ում

Հայաստանում ՌԴ ՊՆ Հարավային ռազմական օկրուգի ռազմակայանի ավիացիոն ստորաբաժանման հրամանատարական կազմը ամառային ուսումնական շրջանի մեկնարկին կմասնակցի հրամանատարական թռիչքների: Տեղեկությունը հայտնում է Հարավային ռազմական օկրուգի մամուլի ծառայությունը։

«Միջոցառումների հիմնական խնդիրը լինելու է ՄիԳ-29 բազմաթիրախային կործանիչների, Մի-8ՄՏՎ-5 և Կա-52 ուղղաթիռների յուրացման գործում երիտասարդ անձնակազմի ուսուցման մեթոդիկայի մշակումը՝ թռիչքային պատրաստության դասընթացի առավել բարդ վարժությունների կատարման ժամանակ»,-նշված է հաղորդագրության մեջ:

Նախատեսվում է նաև բարդ և բարձրագույն օդավարության տարրեր մշակել տարբեր բարձրություններում, այդ թվում՝ գերցածր մակարդակում:

Նշվում է, որ հրամանատարական թռիչքներն ավանդաբար անցկացվելու են ուսումնական շրջանի սկզբում, դրանցում ներգրավվելու է միայն ավիացիոն ստորաբաժանումների ղեկավար կազմը:

ՀՌՕ–ից նաև հայտնում են, որ ռազմակայանի զինծառայողները ավարտել են բարձրլեռնային զորավարժարաններում հրաձգարանների վերանորոգման և սպասարկման պլանային աշխատանքները՝ ամառային ուսումնական շրջանում պարապմունքներ անցկացնելու համար: Օրվա մութ ժամերին պարապմունքներն անցկացնելու համար թիրախային համալիրները զինվել են լուսադիոդներով և լուսավորությամբ։

Աղբյուր՝ Armeniasputnik.am