Խաղաղության պայմանագրի նախագծի նոր տարբերակներին Հայաստանի մեկնաբանություններում մենք կրկին տեսանք տարածքային պահանջներ Ադրբեջանի նկատմամբ. Իլհամ Ալիև

«Հուսով եմ, որ Վաշինգտոնում Ադրբեջանի և Հայաստանի բանակցությունները տեսանելի արդյունքներ կբերեն: Սակայն Խաղաղության պայմանագրի նախագծի նոր տարբերակներին Հայաստանի մեկնաբանություններում մենք կրկին տեսանք տարածքային պահանջներ Ադրբեջանի նկատմամբ»։

Այս մասին չորեքշաբթի օրը հայտարարել է Ադրբեջանի նախագահ Իլհամ Ալիևը մանրամասնելով, որ Բաքուն Հայաստանին էր ուղարկել խաղաղության պայմանագրի նախագծի չորս նոր տարբերակ, ՀՀ-ն վերադարձրեցրել էր դրանք իր մեկնաբանություններով: 

Ալիևը նաև ասել է, որ 2020 թվականի եռակողմ հայտարարությունը «ոչ հրադադարի փաստաթուղթ է, ոչ էլ խաղաղության պայմանագիր»։

«Հայերը կարող են ձգձգել գործընթացը, օգտագործել բանակցային ձեւաչափը, որը մեկնարկել է ոչ թե համաձայնության գալու համար, այլ գործընթացը մինչեւ անվերջություն ձգձգելու համար՝ սպասելով ինչ-որ բանի, սպասելով հրաշքի, սպասելով փոփոխությունների։ Կարծում եմ, որ նրանք բաց կթողնեն հնարավորությունը, քանի որ գրեթե երեսուն տարվա օկուպացիան նրանց ոչ մի առավելություն չի տվել: Ընդհակառակը, նրանք կտրված են տարածաշրջանային զարգացումից»,-ասել է Ալիեւը, հաղորդում է АПА-ն։

Ալիեւի կարծիքով՝ Հայաստանը կորցրել է իրապես անկախ երկիր դառնալու հնարավորությունը։

«Ոչ թե ֆորմալ, այլ փաստացի անկախ։ Եվ հիմա նրանք իրենց համար նոր տեր են փնտրում։ Բայց վերջին պատմությունը պետք է նրանց համար դաս լինի։ Ուստի մենք հույս ունենք, որ նրանք դա կհասկանան»,-հավելել է Ալիեւը։

***

Ադրբեջանի նախագահ Իլհամ Ալիեւը հրաժարվում է նույնիսկ քննարկել Լեռնային Ղարաբաղի հարցը:

«Այսպես կոչված Լեռնային Ղարաբաղի Հանրապետությունը, որը գոյություն չունի, խաղաղության համաձայնագրի տեքստում ներառելու ցանկացած փորձ անարդյունավետ է»,-ասել է նա օկուպացված հայկական Շուշի քաղաքում տեղի ունեցած միջոցառման ժամանակ, հաղորդում է АПА-ն։ Նշելով, որ Ադրբեջանը հույս ունի, որ Հայաստանը կառուցողականություն կդրսեւորի, Ալիեւն ասել է.

«Ինչեւէ, մենք չենք նախատեսում որեւէ այլ միջոց ձեռնարկել, բացի դիվանագիտական միջոցներից: Եթե խաղաղություն չլինի, հաղորդակցություն չլինի, նրանք կրկին մեկուսացված կլինեն»։

Միաժամանակ Ալիեւը դժգոհել է Մինսկի խմբի անգործությունից։ Ալիեւի կարծիքով՝ իր գոյության ողջ ընթացքում ՄԽ-ն արգասաբեր ոչինչ չի արել։

«Դրա հիմնական պատճառն այն էր, որ Հայաստանը չէր ցանկանում ազատել տարածքները։ Հիմա, երբ նա փաստացի հրաժարական է տվել, մենք այդ մասին շատ չենք խոսի։ Բայց հիմնական պատճառը, թե ինչու հակամարտության խաղաղ կարգավորումն այդպես էլ չստացվեց, այն էր, որ դա չէր ցանկանում Հայաստանը»,-կարծում է Ալիեւը։

Zham.am