Միրզոյանն ու ՌԴ ԱԳ փոխնախարարը քննարկել են ԼՂ-ում՝ խաղաղապահ առաքելության գոտում տիրող իրավիճակը

ՀՀ ԱԳ նախարարն Արարատ Միրզոյանն ու ՌԴ ԱԳ փոխնախարար Միխայիլ Գալուզինը Երևանում քննարկել են Լեռնային Ղարաբաղում խաղաղապահների առաքելության գոտում տիրող իրավիճակը։

ՌԴ ԱԳՆ-ի փոխանցմամբ՝ կողմերը նշել են եռակողմ պայմանավորվածությունների համաձայն հայ-ադրբեջանական հարաբերությունների կարգավորման ուղղությամբ տարվող ջանքերի ակտիվացման անհրաժեշտությունը։

ՌԴ ԱԳ փոխնախարար Միխայիլ Գալուզինը Երևանում խորհրդակցություններ է անցկացրել նաև Հայաստանի փոխարտգործնախարար Վահե Գևորգյանի և Մնացական Սաֆարյանի հետ։ Գալուզինը առանձին զրույց է ունեցել նաև արտգործնախարար Արարատ Միրզոյանի հետ:

«Մանրամասն քննարկվել է տարածաշրջանում տիրող իրավիճակը՝ առաջին հերթին Լեռնային Ղարաբաղում ռուսական խաղաղապահ զորակազմի պատասխանատվության գոտում իրավիճակի սրման համատեքստում, ինչը լուրջ անհանգստություն է առաջացնում»,- ասվում է հաղորդագրությունում։

Ընդգծվում է, որ խորհրդակցությունները նախանշել են «հայ-ադրբեջանական հարաբերությունների կարգավորման բոլոր ուղղություններով ջանքերն ակտիվացնելու անհրաժեշտությունը՝ Ռուսաստանի, Հայաստանի և Ադրբեջանի ղեկավարների պայմանավորվածություններին համապատասխան»։

Բացի այդ, նրանք պայմանավորվել են շարունակել շփումները։ Կողմերը նշել են նաև ռուս-հայկական երկխոսության զարգացումը, համապատասխան գերատեսչությունների միջև համագործակցության աճը և առևտրատնտեսական հարաբերությունների ռեկորդային դինամիկան։