Ո՞րն է համամարդկային արժեքը

Ո՞ՐՆ Է ՀԱՄԱՄԱՐԴԿԱՅԻՆ ԱՐԺԵՔԸ

• Աշխարհում կա միայն մեկ համամարդկային արժեք․ դա հաղթելն է։ Այսինքն՝ հաղթելը միակ ՈՒՆԻՎԵՐՍԱԼ արժեքն է, որ ժամանակի բոլոր պահերին բնորոշ է բոլոր մարդկանց։ Ով դավաճանում է այդ արժեքին, նա դադարում է գոյություն ունենալ՝ որպես մարդ կամ մարդկային հավաքականություն։

• Երկրորդ աշխարհամարտի տարիներին Դրեզդենի, վերջինիս քաղաքացիական բնակչության ու ենթակառուցվածքների անխնա ոչնչացումն արևմտյան կործանիչներով կամ Հիրոսիմայի (տե՛ս նկարը) ու Նագասակիի միջուկային հրթիռակոծումն ԱՄՆ կողմից ասածիս ապացույցն են։

• Հայության դժբախտությունն այն է, որ դարեր շարունակ իր էլիտաները ծուլացել են ստանձնել Հայաստանի ազատագրությունը՝ ԱՌԱՋԻՆ հերթին հենվելով սեփական ուժերի վրա, և շատ հաճախ ձգտել են փարվել «մարդկության» օգնությանը։ Իսկ այդ «մարդկությունը», սեփական շահով պայմանավորված, պարտադրել է «համամարդկային արժեքներ»՝ խոստանալով, որ հենց «մեզ խելոք պահենք, պուպուշ դառնանք», մեզ կօգնեն ու կսանձեն մեր թշնամուն։

• Այս է պատճառը, որ հայերիս մեջ մինչ օրս՝ անթիվ եղեռններ ու նախճիրներ վերապրելուց հետո, կան քաղաքական միամիտներ, որոնց իրոք թվում է, թե կան ինչ-որ համամարդկային արժեքներ, ըստ որոնց՝ թշնամու դրոշն անպատվելը խախտում է կամ թշնամու մարդասպան ահաբեկիչին պատժելը խախտում է և այլն։ 

• Մեր հաղթանակները կսկսեն միայն այն ժամանակ, երբ հայության ռահվիրաները լինեն նրանք, որ պարզորեն հասկանում են, որ կա միայն մե՛կ համամարդկային արժեք, և դա հաղթե՛լն է։ Անարժեք ու անբարոյական է միայն պարտությունը։

Քաղաքագետ Էդգար Էլբակյանի Ֆեյսբուքյան էջից