Ո՛չ Ալեն Սիմոնյանի թքույթում, ո՛չ Արթուր Հովհաննիսյանի խոսույթում ՔԿ-ն հանցակազմ չի նկատել

«Իրավական ուղի» ՀԿ համահիմնադիր, փաստաբան Ռուբեն Մելիքյանը ֆեյսբուքյան էջում գրառում է արել ԱԺ նախագահ Ալեն Սիմոնյանի «թքելու» միջադեպի և ՔՊ-ական պատգամավոր Արթուր Հովհաննիսյանի՝ ՄԻՊ թեկնածու Էդգար Ղազարյանի հետ կապված վիճաբանության առնչությամբ։

Գրառումը՝ ստորև․

«Ոչ Ալեն Սիմոնյանի թքույթում և ոչ էլ Արթուր Հովհաննիսյանի խոսույթում քննչկան կոմիտեն առերևույթ հանցակազմ չի նկատել և, ըստ այդմ, կազմել է քրեական վարույթ չնախաձեռնելու արձանագրություն։

Ի տարբերություն նախորդ օրենսգրով նախատեսված՝ քրգործի հարուցումը մերժելու որոշման՝ քրվարույթ չնախաձեռնելու արձանագրություն կարող է կազմվել սոսկ այն բացառիկ դեպքերում, երբ հանցակազմի բացակայությունը կասկածից վեր է։ Օրինակ՝ մեկը դիմի ոստիկանություն ու պնդի, որ ծանոթի նավսի պատճառով ընկել ու ոտքը ջարդել է, կամ, չգիտեմ, հարևանը պարտքը չի վերադարձրել, և այլն։ Եթե նշյալ իսկ հիմք կա, որ կատարվել է հանցանք, պետք է վարույթը նախաձեռնել։

Վերը նշված քպ-ականներից առաջինի արարքը այնքան է քննարկվել, որ բոլորս թերևս կարող ենք մեզ ականատես զգալ։ Դե իսկ երկրորդի խոսքը հեռարձակվում էր «ուղիղ եթերով», ուստի բոլորիս աչքի առաջ էր (ականջ-լեզու կտրել սպառնացող կտրիճն է):

Արդյոք նշույլ իսկ կասկած չկա՞ր, որ Ալենի ու Կտրիճի արարքներում առկա էր խուլիգանության հանցակազմ։ Չէ՞ որ Մհեր Սահակյանին անձեռնմխելիությունից զրկելու միջնորդությունը ներկայացնելիս ԱԺ ամբիոնից շատ հստակ ու մանրամասն բացատրվեց, որ նոր քրօրով խուլիգանությունը թե՛ հստակեցվել է և թե՛ ընդլայնվել, ու այն սահմանափակող նախադեպային իրավունքն այլևս կիրառելի չէ։ Այս պայմաններում ինչպե՞ս կարող էր նշված անձանց արարքում ի սկզբանե ու ի սպառ բացառվել հանցակազմը։

Իրականում նման հարցերում «դատավոր» է յուրաքանչյուրս, քանի որ փաստերը հասու են յուրաքանչյուրիս, և անձամբ իմ դատողությամբ՝ քննչականի կազմած արձանագրությունները ակնհայտ հակաիրավական են և պայմանավորված են ՔՊ-ից ՔԿ-ի քաղաքական կախվածությամբ։ Արձանագրությունները լուրջ հարված են ՔԿ-ի ու առհասարակ իրավապահ համակարգի հեղինակությանը, քաղաքական բաղադրիչ ունեցող այլ գործերով նրանց խոսքի վստահելիությանը։

Իսկ ԴՈ՞Ւ ինչպես ես դատում»։