Սահակաշվիլիին պատրաստվում են սպանե՞լ

Վրաստանի նախկին նախագահ Միխեիլ Սահակաշվիլիին պատրաստվում են սպանել, այդ մասին Կիևում հայտարարել է Ուկրաինայի թաթար լրագրող Այդեր Մուժդաբաևը, նշելով, որ իրեն դա հայտնի է դարձել "հավաստի աղբյուրներից":

Ըստ լրագրողի, Սահակաշվիլիի մահափորձը կազմակերպվելու է հոկտեմբերի 17-ին: Հենց այդ օրն էր, որ Սահակաշվիլին հայտարարել էր Կիևում նոր ուկրաինական "մայդան" սկսելու մասին: Ըստ լրագրողի, Սահակաշվիլիի մահափորձը ուզում են կազմակերպել ռուսական հատուկ ծառայությունները, որպեսզի դրանից հետո այն գցեն Պորոշենկոյի վրա: Դրանով, ըստ լրագրողի, ռուսները մեկ կրակոցով կխփեն երկու նապաստակ: Մի կողմից "կվերացնեն" Սահակաշվիլիին, որն ըստ լրագրողի Մոսկվայի համար ավելի մեծ վտանգ է ներկայացնում, քան` Պորոշենկոն, մյուս կողմից, Սահակաշվիլիի սպանության ողջ պատասխանատվությունը կընկնի Պորոշենկոյի վրա, քանի որ հենց Սահակաշվիլին է սպառնում Պորոշենկոյի իշխանությանը, և ուրեմն, Պորոշենկոյին պետք է շահավետ լինի Սահակաշվիլիի սպանությունը:

Դժվար է ասել, թե որոնք են սույն լրագրողի "աղբյուրները", և այստեղ, եթե լրագրողը իրավացի է, ապա Սահակաշվիլիի "վերացման" մեջ շահագրգռված կարող է լինել ոչ միայն Մոսկվան, այլև` Կիևը: 

Այստեղ մեկ այլ հարցադրում էլ է առաջանում. ինչո՞ւ այս լրագրողը հենց այս պահին է նման հայտարարությունով  հանդես գալիս, և արդյո՞ք միայն կանխարգելիչ առաքելություն ունի նրա հայտարարությունը:

Zham.am