Լավրովը առկա խնդիրների լուծման գործում Իրանին և Ադրբեջանին օգնելու պատրաստակամություն է հայտնել
Ռուսաստանը հույս ունի, որ Իրանի եւ Ադրբեջանի հարաբերություններում լարվածությունը ժամանակավոր բնույթ է կրում եւ շուտով կվերացվի։ Այս մասին, ըստ ՏԱՍՍ-ի, հայտարարել է ՌԴ ԱԳ նախարար Սերգեյ Լավրովը՝ Իրանի արտգործնախարար Հոսեյն Ամիր Աբդոլլահիանի հետ բանակցություններից հետո կայացած մամուլի ասուլիսում։
«Մենք հուսով ենք, որ Բաքվի եւ Թեհրանի հարաբերություններում առկա լարվածությունը ժամանակավոր բնույթ է կրում եւ հնարավորինս շուտ կհաղթահարվի»,-ասել է ռուսական դիվանագիտության ղեկավարը։
Նրա խոսքով, այդ դժվարությունների վերացումը կօգնի խթանել եռակողմ համագործակցությունը Ռուսաստանի, Իրանի եւ Ադրբեջանի մասնակցությամբ, այդ թվում՝ «Հյուսիս-Հարավ միջազգային տրանսպորտային միջանցքի զարգացման շրջանակներում կարեւոր նախագծերի իրականացման համատեքստում»։ «Մենք պատրաստ ենք օգնել մեր բարեկամներին առկա խնդիրների լուծման գործում»,-եզրափակել է Լավրովը։
Աղբյուր՝ News.am
Հետևեք մեզ Facebook-ում