ՌԴ-ն զգուշացրել է Հայաստանին Հռոմի ստատուտին միանալու ծայրահեղ բացասական հետևանքների մասին. ՌԴ ԱԳՆ

Ռուսաստանը զգուշացրել է Հայաստանի իշխանություններին ՌԴ նախագահ Վլադիմիր Պուտինի ձերբակալության մասին լուրի համատեքստում Միջազգային քրեական դատարանի Հռոմի ստատուտին միանալու դեպքում ծայրահեղ բացասական հետևանքների մասին։ Այս մասին ՏԱՍՍ գործակալությանը հայտնել է ՌԴ ԱԳՆ-ի անանուն զրուցակիցը։

«Հայաստանյան գործընկերները զգուշացված են երկկողմ հարաբերությունների մասով ծայրահեղ բացասական հետևանքների մասին», - ասել է գործակալության աղբյուրը։

Միևնույն ժամանակ ՌԴ ԱԳՆ-ում նշել են, որ «Մոսկվայում բացարձակապես անընդունելի են համար պաշտոնական Երևանի ծրագրերը՝ միանալու Միջազգային քրեական դատարանի Հռոմի ստատուտին ՌԴ ղեկավարության մասով կայացրած ապօրինի ու իրավաբանորեն խղճուկ որոշումների համատեքստում»։

Հիշեցնենք, որ մարտի 24-ին Հայաստանի Սահմանադրական դատարանը սահմանադրությանը չհակասող համարեց Միջազգային քրեական դատարանի Հռոմի ստատուտին միանալու Երևանի ցանկությունը, որը, ըստ հայկական կողմի, հնարավորություն կտա դիմել այդ դատարան Ադրբեջանի ռազմական հանցագործությունների մասով։

Հռոմի ստատուտին միանալով՝ ՀՀ-ն պարտավորվում է Միջազգային քրեական դատարանի որոշումները կատարել, այդ թվում և ձերբակալել այդ մարմնի կողմից հետախուզում հայտարարված մարդկանց։ 

Մարտի 17-ին այդ նույն դատարանը ՌԴ նախագահ Վլադիմիր Պուտինին ձերբակալելու որոշում էր կայացրել։

Հիշեցնենք նաև, որ հարցին անդրադարձել էին «Պոլիտէկոնոմիա» հետազոտական ինստիտուտի քաղաքագետ Բենիամին Մաթևոսյանը, ինչպես նաև ՀՀ ԱԺ պատգամավոր Անդրանիկ Թևանյանը։

Թևանյանը մասնավորապես գրել էր, որ ՀՀ ՍԴ–ի կողմից Ռուսաստանի ու անձամբ Պուտինի դեմ ընդունած այս ակնհայտ թշնամական որոշումը փչացնում է հայ–ռուսական հարաբերությունները և լրջորեն սպառնում մեր անվտանգությանը։

Zham.am