Բրենդան Ֆրեյզերը` լավագույն դերասան, Միշել Յեյոն՝ լավագույն դերասանուհի. հայտնի են դարձել «Օսկար 2023»-ի հաղթողները

Լոս Անջելեսի «Դոլբի» թատրոնում կայացել է կինոաշխարհի ամենահեղինակավոր մրցանակաբաշխություններից մեկի՝ «Օսկար» կինոմրցանակի հանձնման 95-րդ արարողությունը։ Հանդիսավոր արարողությունը տևել է մոտ երեք ժամ, բոլոր անվանակարգերում հաղթողներն արդեն հայտնի են։

«Լավագույն ֆիլմ» անվանակարգում «Օսկար»-ի է արժանացել «Ամեն ինչ, ամենուր և միանգամից» ֆիլմը։

Լավագույն դերասան է ճամաչվել Բրենդան Ֆրեյզերը ռեժիսոր Դարեն Արանովսկու «Կետը» ֆիլմում կերտած իր կերպարի համար, իսկ լավագույն դերասանուհի՝ Միշել Յեյոն՝ «Ամեն ինչ, ամենուր և միանգամից» կինոնկարի համար: Յեյոն առաջին ասիացի դերասանուհին է, որն արժանացավ «Օսկար»-ի:

«Լավագույն ռեժիսոր» անվանակարգում մրցանակը հանձնվեց Դանիել Շայներտին և Դանիել Կվանին՝ «Ամեն ինչ, ամենուր և միանգամից» ֆիլմի համար: Կինոնկարը հաղթեց նաև «Լավագույն մոնտաժ» և «Լավագույն օրիգինալ սցենար» անվանակարգերում: Բացի այդ, այս ֆիլմում իրենց դերերի համար մրցանակի են արժանացել նաև դերասանուհի Ջեյմի Լի Քյորտիսն («Երկրորդ պլանի լավագույն դերասանուհի») ու դերասան Կե Հյուի Կուանը («Երկրորդ պլանի լավագույն դերասան»):

«Լավագույն ադապտացիոն սցենար» անվանակարգում հաղթող է ճանաչվել «Խոսում են կանայք» ֆիլմը, իսկ «Լավագույն օպերատոր» է ճանաչվել Ջեյմս Ֆրենդը («Արևմտյան ճակատում նորություն չկա»)։

«Լավագույն անիմացիոն ֆիլմ» անվանակարգում հաղթել է «Գիլերմո դել Տորոյի Պինոկիոն» ֆիլմը, իսկ «Լավագույն արտասահմանյան ֆիլմ» անվանակարգում՝ «Արևմտյան ճակատում նորություն չկա»-ն։ «Ավատար. ջրի ուղին» ֆիլմ «Օսկար»-ի է արժանացել «Լավագույն վիզուալ էֆեկտներ» անվանակարգում։

Աղբյուր` Tert.am