ՌԴ-ն ծրագրում է ԱԳՆ-ների եռակողմ հանդիպում. այս անգամ կմեկնի՞ Արարատ Միրզոյանը

MediaHub-ի տեղեկություններով՝ Մոսկվան ծրագրում է Հայաստանի և Ադրբեջանի ԱԳ նախարարների մասնակցությամբ եռակողմ հանդիպում: Նախատեսվում է, որ այն տեղի կունենա մինչև մարտի վերջ Մոսկվայում:

Ըստ մեր աղբյուրի՝ Երևանը դեռ չի պատասխանել իր մասնակցության մասով:

MediaHub-ի հետ զրույցում ՀՀ ԱԳ նախարարության խոսնակ Վահան Հունանյանը մեր հարցմանը տվեց ավանդական դարձած պատասխան.

«ԱԳ նախարարի այցերի ու հանդիպումների մասին մենք նախապես՝ պատշաճ ժամկետներում, տեղեկացնում ենք»:

Մեր այն հարցը, իսկ արդյոք Արարատ Միրզոյանը հակված է այս անգամ ընդունել Մոսկվայի հրավերը (անկախ նրանից, թե երբ կլինի այդ հրավերը), մնաց անպատասխան:

Հիշեցնենք, որ դեկտեմբերի 22-ին ՀՀ ԱԳՆ հայտնեց, որ Արարատ Միրզոյանը չի մեկնի դեկտեմբերի 23-ին Մոսկվայում կայանալիք Հայաստանի, Ռուսաստանի և Ադրբեջանի արտգործնախարարների հանդիմանը։ Հանդիպումը կայացել էր երկկողմ ձևաչափով, որից հետո ասուլիսում Սերգեյ Լավրովը բավական կոշտ գնահատական էր տվել Արարատ Միրզոյանի որոշմանը: Արարատ Միրզոյանը նույն տոնայնության մեջ հերքել էր Լավրովի այն հայտարարությունը, թե հանդիպումը հետաձգելու հայկական կողմի խնդրանքի մասին ՌԴ-ն տեղեկացել է ոչ թե դիվանագիտական խողովակներով, ինչպես ընդունված է, այլ ՀՀ ԱԳՆ հաղորդագրությունից: 

«Հանդիպումը հետաձգելու հայկական կողմի խնդրանքը ԱԳՆ-ն եւ Ռուսաստանում Հայաստանի դեսպանությունը փոխանցել են թե՛ ՌԴ ԱԳՆ կենտրոնական ապարատի ներկայացուցիչներին, թե՛ Հայաստանում Ռուսաստանի դեսպանությանը»,- ասել էր Արարատ Միրզոյանը:

Հաշվի առնելով վերջին զարգացումները, հնարավոր է, որ հայկական կողմն այս անգամ էլ մերժի Մոսկվա մեկնելու առաջարկը:

Ի դեպ նշենք, որ մեր աղբյուրի փոխանցմամբ՝ եռակողմ հանդիպման նախապատրաստվելու մասին հայտնի է դարձել մինչև մարտի 5-ի ադրբեջանական ագրեսիան, որի հետևանքով Արցախում երեք ոստիկան զոհվեց, մեկը վիրավորվել է: