Կկայանա «Գրանշան» տառատեսակների միջազգային մրցույթն ու համաժողովը

ՀՀ մշակույթի նախարարության աջակցությամբ՝ ս. թ. հոկտեմբերի 2-7-ը, Թումո ստեղծարար տեխնոլոգիաների կենտրոնում /հասցե՝ Հալաբյան 16/ կանցկացվի «Գրանշան» տառատեսակների միջազգային մրցույթն ու համաժողովը:

Ս. թ. հոկտեմբերի 5-ին, ժամը 16:00-ին, Թումո ստեղծարար տեխնոլոգիաների կենտրոնում տեղի կունենա «Գրանշան» 6-րդ համաժողովի բացումը, որի ընթացքում կհայտարարվեն «Գրանշան 2017» մրցույթի հաղթողները՝ ըստ լեզվական համակարգերի։

Հիշեցնենք, որ «Գրանշան» ոչ լատինական տառատեսակների միջազգային մրցույթներն անցկացվում են ՀՀ մշակույթի նախարարության աջակցությամբ 2008 թվականից: 2010 թվականից համակազմակերպիչ է հանդիսանում նաև Մյունխենի «Կոհան ընդ Փարթներս» ընկերությունը։ 2012 թվականից անցկացվում են նաև նույն վերտառության միջազգային համաժողովներ, որտեղ քննարկվում են տարբեր լեզվական համակարգերի արդի խնդիրներին վերաբերող հարցեր և փնտրվում դրանց լուծումները։

2010 թվականին մրցանակներ ստացած GHEA Mariam և GHEA Grapalat տառատեսակները ՀՀ կառավարության կողմից ընդունվել են որպես պետական թղթաշրջանառության համար պարտադիր տառատեսակներ։