Վստահություն չկա որոշում կայացնողների նկատմամբ․ Արթուր Վանեցյան
Ցավոք, վիճակն այսօր ավելի վատ է, քան հեռավոր 90-ականներին․ Արցախը շրջափակված է, Ադրբեջանը գործնականում ամեն օր մտածում է մի նոր բան անել արցախահայությանը հուսալքելու, հիասթափեցնելու համար և ցավոք, տեղ-տեղ սա նրան հաջողվում է, հաջողվում է, որովհետև չկա միասնություն, համախմբում և չկա վստահություն, հաստկապես որոշումներ կայացնողների նկատմամբ։ Այս մասին այսօր «Ղարաբաղյան պրոֆիլ» քննարկման ժամանակ ասաց «Հայրենիք» կուսակցության ղեկավար Արթուր Վանեցյանը։
«Մեկ բռունցք դառնալու փոխարեն, այսօր տեսնում ենք, թե ինչպես են մեր ժողովրդին պառակտում՝ յուրայինների և հակառակորդների, սևերի և սպիտակների, նախկինների և ներկաների, ռուսամետերի և արևմտամետերի։ Սրա արդյունքում չենք կարողանում ունենալ միասնություն, չենք կարողանում ստեղծել այն ուժը, որով կկարողանանք պայքարել այս դժվար իրավիճակում»,-ասաց նա։
Ըստ Վանեցյանի՝ կասկած չկա, որ այս իրավիճակի գլխավոր մեղավորը և պատասխանատուն գործող իշխանություններն են։
«Բախտի բերմամբ, թե պատահմամբ, իշխանություն դառնալուց հետո, Նիկոլ Փաշինյանը վարել է հետևողական քաղաքականություն, որը բերել է Արցախի այսօրվա վիճակին։ Վտանգված է ոչ միայն Արցախը, այլ նաև Հայաստանը։ Այդ քաղաքականությունը բերեց նրան, որ այսօր Հայաստանի ղեկավարը խաղաղություն է մուրում և փորձում է մեր ժողովրդին համոզել, որ ուղղակի այլ տարբերակ չկա։ Խաղաղության օրակարգին դեմ խոսելը անլրջություն է, որևէ նորմալ մարդ չի կարող խոսել խաղաղության օրակարգի դեմ, բայց մենք բոլորս պետք է հասկանանք՝ ինչ գին ենք վճարելու այդ խաղաղության համար, որովհետև այդ գինը վճարելու են ոչ թե այսօրվա կառավարիչները, այսօրվա իշխանությունները, այլ վճարելու ենք մենք բոլորս՝ հայ ժողովուրդը, Արցախը և Հայաստանը»,- ընդգծեց նա։
Արթուր Վանեցյանը հիշեցրեց, որ օրեր առաջ ՀՀ-ն հայտարարեց՝ իր խաղաղության պայմանագրի տարբերակն է ներկայացրել Ադրբեջանին և պատրաստ է ստորագրել այդ պայմանագիրը։ «Կրկնում եմ՝ արդյո՞ք մենք գիտենք, թե ինչ է գրված այդ պայմանագրում, ի՞նչ գին ենք վճարելու պայմանագրի ստորագրման դիմաց։ Մենք պետք է ստիպենք, որ ժողովրդի թիկունկում ոչ մի փաստաթուղթ չստորագրվի, թող հրապարակեն, տեսնենք և հասկանանք՝ արդյոք մեզ պետք է այդպիսի խաղաղություն, թե ոչ։ Եվ հարց է առաջանում՝ Նիկոլ Փաշինյանի կողմից ստորագրվելիք խաղաղության պայմանագրից հետո արդյո՞ք հայերը կարողանալու են ապրել իրենց երկրում, ինքնիշխան Հայաստանում, ունենալո՞ւ ենք Արցախ, թե ոչ, Արցախի ժողովրդի ինքնորոշման անքակտելի իրավունքը իրացվելու է, թե ոչ, արցախահայությունը ունենալու է անվտանգության երաշխիքներ, թե ոչ։ Հարցերը շատ են, ուստի ուզում եմ հավաստիացնել, որ անձամբ ես, իմ գործընկերները, հայության ճնշող մեծամասնությունը թույլ չեն տալու իշխանություններին ստորագրել այնպիսի փաստաթուղթ, որը կբերի մեզ ավելի խորը ճգնաժամի և կվտանգի Արցախի և Հայաստանի ապագան»,-շեշտեց նա։
Ելույթի վերջում Արթուր Վանեցյանը շնորհավորեց բոլորին Ղարաբաղյան շարժման 35-ամյակի կապակցությամբ։
Մանրամասները՝ տեսանյութում։
Հետևեք մեզ Facebook-ում