Արագած Ախոյանի պատճառով Թուրքիայի և Ադրբեջանի միջև կարող է լուրջ ճգնաժա՞մ առաջանալ

Ինչպես հայտնի է, սեպտեմբերի 22-ին ԱԺ նախկին պատգամավոր Արագած Ախոյանի աջակցությամբ մի շարք թուրք գործիչներ Երևանից մեկնեցին Ստեփանակերտ` այնտեղ տեղում ծանոթանալու Ղարաբաղի հետ: 

Թուրք գործիչների այս քայլը խիստ վրդովմունք առաջացրեց Բաքվում: Նրանք հռչակվեցին դավաճաններ: Ավելին, ադրբեջանական շրջանակները նույնիսկ հայտարարեցին, որ պարզվում է նույնիսկ Թուրքիայում կան հայկական լոբիստական շրջանակներ: Եվ իբր այս գործիչները հենց այս լոբիստական շրջանակների անդամներն են: Եթե հավատանք ադրբեջանական գործիչներին, ապա կստացվի, որ Թուրքիայում գործող հայկական լոբիստների հայաստանյան կուրատորն էլ... Արագած Ախոյանն է: Բանը հասավ նրան, որ Ադրբեջանում սկսեցին պահանջել, որ թուրքական իշխանությունները պատժամիջոցներ կիրառեն սույն գործիչների հանդեպ: Իսկ երբ տեսան, որ արձագանք չկա, Ադրբեջանը պաշտոնապես սույն գործիչներին միջազգային հետախուզում հայտարարեց` փաստացի ստիպելով, որ պաշտոնական Անկարան ստիպված լինի կոնկրետ գործողություններ կիրառել:

Սակայն արձագանք նույնպես չեղավ: Պաշտոնական Անկարայի ներկայացուցիչը հայտարարեց, որ Թուրքիան պաշտպանում է Ադրբեջանի տարածքային ամբողջականությունը և չի աջակցում իր քաղաքացիների մտադրությունը` մեկնել Ղարաբաղ` առանց Բաքվի համաձայնության: Դիվանագիտական լեզվով ասած, սա նշանակում էր Անկարայի կողմից ապտակ` Ադրբեջանին: Թե ինչ արձագանք կլինի Բաքվից, դժվար է ասել: Չի բացառվում, որ այս դեպքի շուրջ կարող է առաջանալ փոքրիկ ճգնաժամ` երկու երկրների միջև, որովհետև դժվար թե Թուրքիան գնա բաց ռեպրեսիվ քայլերի իր այդ քաղաքացիների հանդեպ, որոնք մեկնել էին Ղարաբաղ: 

Zham.am