Ցանկացած խցանված խաչմերուկ մուտք գործած մեքենայի վարորդն այսուհետ կտուգանվի. Խաչատրյան

Այսուհետ ցանկացած խցանված խաչմերուկ, անկախ նրանից` այնտեղ կա «խաչմերուկի տարածք» գծանշումը (այսպես կոչված վաֆլի), թե ոչ, մուտք գործող տրանսպորտային միջոցի վարորդը կտուգանվի։ Այսօր հրավիրված ասուլիսի ժամանակ այս հայտարարությունն արեց ՀՀ ՏԿԵՆ ճանապարհային քաղաքականության բաժնի ավագ մասնագետ Արուսյակ Խաչատրյանը։ «Նախկինում միայն դեղին գծանշումով խաչմերուկ չէր կարելի մուտք գործել, եթե առջևում առաջացել էր խցանում, հիմա լրացում ենք արել օրենքում, որպեսզի մի փոքր մեղմենք խցանումները»,-ասաց նա։

Մասնագետի խոսքով` Երևանում սա ամենատարածված խախտումն է, որի պատճառով առաջանում են արհեստական խցանումներ։ Հայաստանի ճանապարհային երթևեկության նշաններում մի շարք այլ փոփոխություններ էլ կլինեն։ Խաչատրյանը վստահեցրեց` դրանք ուղղված են ճանապարհային երթևեկության կազմակերպման անվտանգության բարձրացմանը։ «Բոլոր որոշումները կապված են տեխնիկական միջոցների հետ։

Օրինակ` նշանների կամ լուսացույցերի տեղակայման կամ չափերի փոփոխություններ կլինեն։ Այսպիսով մենք ավելի ճկունություն ենք հաղորդում մեր քարացած որոշումներին»,-նշեց նա։ Մասնագետն անդրադարձավ նաև «Էլեկտրոմոբիլների լիցքավորում» նշանին, որը հիմնականում կգործարկվի դպրոցների ու մանկապարտեզների մոտ։

«Տեղեր կան, որտեղ օրվա տարբեր ժամերին ճանապարհային երթևեկության նշանը պետք է տարբեր տեղեկություն հաղորդի։ Օրինակ` դպրոցների մոտ, դասերի ժամերին թույլատրելի արագությունը այլ պետք է լինի, բայց դասերից հետո կամ ոչ աշխատանքային ժամերին այն կարող է փոփոխվել, որպեսզի վարորդի համար արհեստական խոչընդոտ չլինի։ Սա հնարավոր է կազմակերպել միայն փոփոխվող ճանապարհային նշանով»,-ասաց նա։ Շուտով կգործարկվեն նաև անկյունագծային հետիոտնային անցումները առավել բանուկ խաչմերուկներում, որտեղ հետիոտնային ինտենսիվությունը ժամում 900 և ավել մարդ է։ Օրինակ բերվեց Մաշտոց–Թումանյան խաչմերուկը, որտեղ, ամենայն հավանականությամբ, առաջինը կգործարկվի ճանապարհային նոր գծանշումը։

Աղբյուրը՝ armeniasputnik.am