<<Կարմիր գլխարկը>>․ Տիկնիկային թատրոնի բացման առթիվ
Իջևանը տիկնիկային թատրոն ունի։ Բացումը կայացավ դեկտեմբերի 6-ին՝ <<Կարմիր գլխարկ>> ներկայացումով։ Նախաձեռնության հեղինակը բոլորիս ճանաչ, տաղանդաշատ Նարինե Գրիգորյանն է՝ պարուսույց, նկարիչ, տիկնիկագործ, ով տարիներ շարունակ իր արվեստի բազմաբովանդակ դրսևորումներով գեղեցիկ ու բովանդակալից մանկություն է շնորհել շատ ու շատ երեխաների։ Հիշենք նրա <<Խատուտիկ>> պարային համույթի անմոռանալի ելույթները, մրցանակները․․․
Ահավասիկ, նրա նոր քայլը։ նորակառույց մի գեղեցիկ շենքի ոչ մեծ մի սրահ տիկնիկային թատրոնի է վերածել և ռեժիսորական ուրույն ձեռագրով բեմադրել <<Կարմիր գլխարկը>>, որն ուշագրավ է նաև մեծահասակների համար։
Նկարչական գունային նրբաոճ ձևաորումները, երգ – երաժշտության բարձրաճաշակ ընտրությունը, գեղեցիկ տիկնիկները, Կարմիր գլխարկի շփումն ու հաղորդակցումը հանդիսատեսների հետ՝ հոգեթով մի մերձեցմամբ անուշաբույր մթնոլորտ են ստեղծում դահլիճում՝ գովերգելով համերաշխ ընտանիքը, մարդկային ջերմ հարաբերությունները, որոնք էլ դառնում են չարին հաղթելու լավագույն միջոց։ Այս ամենը, ընդգծված դաստիարակչական շեշտադրությամբ, հանդիսատեսի մեջ ձևավորում են նաև գեղագիտական ճաշակ, գեղեցիկը տեսնելու, գեղեցիկով հիանալու հմտություն։
<<Կարմիր գլխարկը>> խոսուն սկիզբ է։
Սատարենք ու աջակցենք մեր Նարինե Գրիգորյանին, որպեսզի նրա մարդասիրական մղումները, համակցված իր ստեղծագործական բազմաճյուղ կարողություններով ու համառ աշխատասիրությամբ, հիմնավոր ծառայեն մեր հասարակությանը և հատկապեսմեր մատաղ սերնդին․․․
Ժենյա Խաչատրյան
Թոշակառու ուսուցչուհի
Իջևան
Հետևեք մեզ Facebook-ում