«Նացիստնե՛ր, հեռացե՛ք». Գերմանիայի ընտրություններում ազգայնականների գրանցած հաջողությունը բողոքի ալիք է առաջացրել

Գերմանիայում կիրակի կայացած խորհրդարանական ընտրությունների արդյունքներով առաջին անգամ գերմանական խորհրդարան է անցել «Այլընտրանք Գերմանիայի համար» ազգայնական կուսակցությունը, որը հանդես է գալիս ներգաղթի սահմանափակման օգտին և երկրում իսլամի տարածման դեմ, հայտնում է BBC-ն:

Կուսակցության գրանցած հաջողությունը Գերմանիայի խոշոր քաղաքներում բողոքի ակցիաներ է առաջացրել, որոնք սկսվել են կիրակի երեկոյան:

Մոտ 700 մարդ հավաքվել է Բեռլինի Ալեքսանդերպլացում՝ պաստառներով և կուսակցության դեմ կարգախոսներով:

«Այլընտրանք Գերմանիայի համար» կուսակցությունը ստացել է 13 տոկոս ձայն, ինչը թույլ կտա նրան զբաղեցնել նոր խորհրդարանի 709 տեղից 94-ը:

Կուսակցության դեմ բողոքող ցուցարարները հավաքվել են կուսակցության գրասենյակի մոտ, որը տոնում էր ընտրություններում իր ռեկորդային արդյունքները: Ցուցարարները վանկարկել են «Ռասիզմն այլընտրանք չէ», «ԱԳՀ-ն ռասիստների կույտ» և «Նացիստնե՛ր, հեռացե՛ք» կարգախոսներ:

Բեռլինի ոստիկանությունը վերահսկել է իրավիճակը՝ թույլ չտալու համար փողոցային բախումներ: Մայրաքաղաքի ոստիկանությունը Twitter-ում հայտնել է, որ որոշ աշխատակիցների ցուցարարների նետած քարեր և շշեր են դիպել:

«Այլընտրանք Գերմանիայի համար» կուսակցության դեմ բողոքի ցույցեր են տեղի ունեցել նաև Քյոլնում, Ֆրանկֆուրտում, Մյունխենում, Դրեզդենում և այլ խոշոր քաղաքներում:

Գերմանական կենտրոնական ընտրական հանձնաժողովի վերջնական տվյալների համաձայն՝ Քրիստոնեա-դեմոկրատական միություն/Քրիստոնեա-սոցիալական միություն դաշինքը զբաղեցրել է առաջատար դիրք՝ 33 տոկոս ձայնով, դա վատագույն արդյունքն է 1949 թվականից ի վեր: Մարտին Շուլցի գլխավորած Գերմանիայի սոցիալ-դեմոկրատական կուսակցությունը ստացել է 20,5 տոկոս ձայն՝ նույնպես գրանցելով պատմության ընթացքում վատագույն արդյունքը:

Աղբյուրը` Tert.am