Արցախում տեղի ունեցողը կարող է տեղի ունենալ ՀՀ ցանկացած մարզում. Տիգրան Աբահամյան. Տեսանյութ
Որքան էլ մենք Լաչինի միջանցքի փակումը դիտարկում ենք հումանիտար ճգնաժամի տեսանկյունից, պետք է գիտակցել, որ սա առաջին հերթին քաղաքական խնդիր է, անվտանգային խնդիր է, որովհետեւ եթե նույնիսկ միջանցքում անխափան երթևեկությունը վերականգնվի, դրանով իրավիճակը չի հանգուցալուծվելու։ Այս մասին, այսօր՝ դեկտեմբերի 20-ին, ԱԺ-ում լրագրողների հետ ճեպազրույցի ժամանակ նշեց «Պատիվ ունեմ» խմբակցության քարտուղար Տիգրան Աբրահամյանը:
«Ցանկացած իրավիճակի պատասխանատվությունը իշխանություններինն է, անկախ նրանից՝ ով է իշխանության՝ Նիկո՞լը, թե՞ Պողոսը: Բայց եթե հաշվի ենք առնում օրվա իշխանությունների քաղաքական տապալման հետևանքները, որը երկիրը հասցրել է ողբերգական վիճակի, բնական է, որ ՀՀ իշխանությունն ունի թիվ մեկ պատասխանատուի կարգավիճակ։ Լավ, եթե Ռուսաստանն իր ֆունկցիան չի իրականացնում եւ որեւէ փուլում լինում է ոչ էֆեկտիվ, ապա ով պետք է զբաղվի Արցախում ապրող մեր հայրենակիցների ճակատագրով: Որովհետեւ այն, ինչ տեղի է ունենում Արցախում, կարող է տեղի ունենալ ՀՀ ցանկացած մարզում, այդ ժամանակ էլ կասեն՝ ՌԴ-ն չիրականացրեց իր պարտականությունը, ինչ անի խեղճ իշխանությունը։
Արցախում ապրում են մեր հայրենակիցները և ՀՀ իշխանությունները չեն կարող սահմանափակվել ինչ-որ նամակներով և պատասխանատվությունը բարդել միջազգային դերակատարների վրա»,- ասաց Աբրահամյանը։ Նա ընդգծեց, որ եթե այս շրջափակումը շարունակվի եւս մեկ շաբաթ, սա բերելու է ծայրահեղ իրավիճակի եւ այդ իրավիճակի համար պատասխանատու է Հայաստանի իշխանություն:
Պատգամավորը նշեց, որ այս պահին Ադրբեջանի գլխավոր նպատակներից մեկը Արցախի հանքարդյունաբերական ընկերությունների փակումն է. «Այդ ընկերությունները պետական բյուջեում ունեն մեծ մասնակցություն, դրանք մի քանի հազար աշխատատեղեր են և Արցախի հայաթափման գործում Արդրբեջանը կարևորում է այդ ընկերությունների փակումը»,- ընդգծեց Աբրահամյանը։
Հետևեք մեզ Facebook-ում