Սերժ Սարգսյանը հակադարձում է Տեր- Պետրոսյանի թեզին` փորձելով հանգստացնել հասարակությանը
Երեկ, Հայաստանի անկախության 26-րդ տարեդարձի առթիվ, ՀՀ նախագահը հրավիրել էր տոնական ընդունելություն ոչ թե մարզահամալիրում, ինչպես որ անում էր ավանդաբար, այլ` Պաշտպանության նախարարության վարչական համալիրում: Սա յուրօրինակ նոր խորհուրդ էր` ուղղված վերնախավին ու հանրությանը:
Նշենք, որ նախօրեին մեծ աղմուկ էին հանել Էդվարդ Նալբանդյանի հանրահայտ խոսքերը` տարածքների վերադարձման մասին: Հանրությանը հետաքրքրում էր, թե ինչ կարծիքի է այս խնդրի մասին Սերժ Սարգսյանը: Եռաբլուր այցելության ժամանակ նա, սակայն, կտրականապես մերժեց շփվել լրագրողների հետ` հավանաբար կանխազգալով, որ հնչելու է այդ հարցը: Փոխարենը հանրությանը հանգստացնելու համար իր ելույթում Պաշտպանության նախարարության համալիրում նա կտրուկ հակադրվեց Տեր - Պետրոսյանի հայտնի թեզին` համաձայն որիառանց Ղարաբաղի խնդրի կարգավորման Հայաստանը չի կարող ապագա ունենալ, մանավանդ տարեցտարի նավթադոլարներով հարստացող և ուժեղացող Ադրբեջանի ֆոնին: Այս առիթով Սերժ Սարգսյանը բառացիորեն հայտարարեց հետևյալը.
"Անցած 26 տարիները միարժեքորեն ցույց են տվել, որ Հայաստանի և Արցախի Հանրապետությունները կենսունակ են և պաշտպանունակ: Ցույց են տվել, որ սին էին այն հեքիաթները, թե իբր շրջափակված Հայաստանը դատապարտված է ձախողման, իսկ նավթագազային Ադրբեջանն անպայման հասնելու է մեծ հաջողության: Ավելին, մեզ փորձում էին համոզել, թե իբր Ադրբեջանի տնտեսական հաջողությունները գրավական էին լինելու Արցախի և Հայաստանի ոչնչացման:
Քարոզչական և քաղաքական առասպելների ամենադաժան, բայց արդարացի թշնամին իրականությունն է: Իսկ իրականությունը ազատ և զարգացող, օր օրի ամրացող ու շենացող հայկական երկու պետություններն են":
Ըստ գործող նախագահի, Հայաստանը կարող է դիմակայել Ադրբեջանի նավթադոլարներին` առաջադեմ տեխնոլոգիաներով:
«Աշխարհում այսօր տեղի ունեցող գիտատեխնիկական նոր հեղափոխությունը հայ ժողովրդի դաշնակիցն է: Մեր այդ հզոր դաշնակիցը փոխում է և դեռ փոխելու է գրեթե բոլոր պատկերացումները ռեսուրսների մասին, լինեն դրանք բնական, մարդկային, ֆինանսական և այլ: Նոր տեխնոլոգիաները մարդկանց և ժողովուրդներին հնարավորություն են տալիս համեստ ռեսուրսներով հասնել անհամեմատ մեծ արդյունքների: Սա ճակատագրի նվեր է համեստ ռեսուրսներով Հայաստանի համար, և մենք իրավունք չունենք չօգտագործելու պատմական այս հնարավորությունը». նշեց վերջում նա:
Հակոբ Կարապետյան
Հետևեք մեզ Facebook-ում