Ադրբեջանը սկսեց սպասելի սադրանքները միջանցքի նկատմամբ. Չեմ բացառում, որ սա լայնամասշտաբ սադրանքի նախերգանքն է

Ադրբեջանը սկսեց սպասելի սադրանքները միջանցքի նկատմամբ. «էկոակտիվիստների» անվան տակ մի խումբ ադրբեջանցիներ (ամենայն հավանականությամբ՝ զինվորականներ) այս պահին Շուշիի մոտ փակել են դեպի Ստեփանակերտ տանող ճամփան` փաստացի կտրելով այն մայր Հայաստանից: 

Չեմ բացառում, որ սա լայնամասշտաբ սադրանքի նախերգանքն է, որով թշնամիները նպատակ են հետապնդում փակել Արցախը սնուցող զարկերակն ու հայաթափել Արցախը։

Ամեն դեպքում, շարունակենք «քննարկել» Երևանի լուսավորության «հույժ կարևոր» հարցը քանի դեռ ՀՀ դե-ֆակտո ԱԺ նախագահն էլ Կատարում ֆուտբոլ է նայում:

#հակաՀայաստան

Թյուրքագետ Վարուժան Գեղամյանի ֆեյսբուքյան էջից

Հիշեցնենք, որ Արցախի Հանրապետության Տեղեկատվական շտաբը հայտարարություն էր տարածել առ այն, որ. 

«Քիչ առաջ Շուշի-Քարին տակ խաչմերուկի հատվածում քաղաքացիական հագուստներով մի խումբ ադրբեջանցիներ բնապահպանական պատճառաբանությամբ փակել են Ստեփանակերտ-Գորիս մայրուղին:

Ակնհայտ է, որ Ադրբեջանն այս քայլով դիմում է սադրանքի Հայաստանի և Արցախի միջև ցամաքային կապի ընդհատման և խաղաղ բնակչությանը հոգեբանական ահաբեկչության ենթարկելու համար:

Միջադեպի վերաբերյալ պատշաճ տեղեկացված է Արցախում տեղակայված ռուսական խաղաղապահ զորակազմի հրամանատարությունը: Արցախի լիազոր պետական մարմինները ձեռնարկում են բոլոր հնարավոր միջոցները իրավիճակի կարգավորման ուղղությամբ»։