Ովքեր լիցենզիա ստացան, ցուցադրում են այս իշխանություններին հաճո լուրեր. Բագրատ Եսայան

Hraparak.am-ը գրում է.

Ինչպես արդեն տեղեկացրել ենք, «Երկիր մեդիա» հեռուստաընկերությունը երեկ կայացած մրցույթի արդյունքում վերջին երկրորդ տեղում էր, ուստի կարող է զրկվել պետական հեռարձակման արտոնագրից, իսկ Հ2-ը կրկին հաղթող չճանաչվեց: «Հրապարակը» մրցույթի արդյունքների հրապարակումից հետո զրուցել է «Երկիր մեդիա» հեռուստաընկերության տնօրեն Բագրատ Եսայանի հետ:

- Պարոն Եսայան, 2020 թվականին տեղի ունեցած մրցույթի արդյունքում «Երկիր մեդիա» հեռուստաընկերությունը միավորների քանակով զբաղեցրեց երկրորդ տեղը, այս անգամ հակառակը տեղի ունեցավ: Հեռուստաընկերությունը լիցենզավորման իրավունք չստացավ: Ինչո՞ւ…

- Նախորդ մրցույթը տեղի ունեցավ 2020 թվականի դեկտեմբերին, այո, բարձր միավորներ էինք ստացել:

- Ինչպե՞ս ստացվեց, որ հենց երկու ընդդիմադիր հեռուստաընկերությունները մրցույթից դուրս մնացին:

- Զարմանալի է, որ դեռ զարմանում եք…. մի իշխանություն, որ Արցախն է հանձնել, պատճառ է դարձել 5 հազար տղաների մահվան, ու ավելին՝ համառորեն մնում է իշխանության ղեկին, դեռ մի բան էլ` իր ներկայացուցիչները կուսակցականացնում են պետական գրեթե բոլոր կառույցները: Հիմա ինչո՞ւ եք զարմանում, որ ՀՌՀ-ն կուսակցականացնելուց հետո մենք ունենում ենք այս պատկերը:

- Հաջորդիվ ի՞նչ քայլեր պետք է ձեռնարկեք:

- Կստանանք գրավոր որոշումը եւ միայն դրանից հետո կմշակենք մեր ծրագրերը:

- Ցածրորակ հեռուստասերիալներ ցուցադրող թիվիները ստացան բավականին բարձր միավորներ: Ստացվում է, որ ՀՌՀ-ի ճաշակը կուսաթաղանթի, հարս-սկեսուր հարաբերությունների, սպանությունների ու սեռական ակտի մասին պատմող սերիալների շրջանակներում է սահմանափակվում: Գուցե «Երկիր մեդիան» է՞լ նման գռեհիկ արտադրանքներով սկսի հանդես գալ: Այդ դեպքում գուցե ՀՌՀ-ն ձեզ էլ բարձր միավորներ նշանակի:

- Չեմ ցանկանում խոսել մյուս թիվիների մատուցած պրոյեկտների մասին: Նրանք, ովքեր ստացան լիցենզիա, ցուցադրում են այս իշխանություններին հաճո լուրեր եւ վերլուծություններ: Հաղորդումների որակին էլ չեմ ուզում անդրադառնալ: Երկու օր առաջ սկսել ենք վեց մասից բաղկացած «Արցախ» ֆիլմը ներկայացնել մեր հեռուստադիտողներին, որի առաջին մասը վերաբերում է Արցախի պատմությանը, հնագույն ժամանակներին….

- Ո՞վ է ֆիլմի ռեժիսորը:

- Այն ամբողջությամբ «Երկիր մեդիայի» պրոդուկտն է: Նման ազգային բովանդակություն ունեցող թիվի ես չգիտեմ՝ կա՞, թե՞ չկա:

- Հնարավո՞ր է Արցախի մասին ֆիլմն է ՀՌՀ-ի զայրույթը շարժել, գուցե Ադրբեջանը փառաբանող ֆիլմ ներկայացնեք, դա նրանց դուր գա…

- Չեմ կարծում... սա մեզ համար սպասելի որոշում էր: Փոխվել են ՀՌՀ-ի անդամները, այնպես որ, ես զարմացած չեմ…