Հայաստանում 4 մլն մարդ վարչական մեթոդներով հնարավոր չէ բնակեցնել

Հայաստան - Սփյուռք համաժողովում Սերժ Սարգսյանի երեկվա ելույթը հիմնականում նվիրաված էր երկրի դեմոգրաֆիկ խնդրին: Ավելին, գործող նախագահը նույնիսկ առաջարկեց հաջորդ համաժողովը նվիրել հենց այդ խնդրին: 

Հիշեցնենք, որ իշխանությունները որպես տեսլական հայտարարում են, որ 2040 թվականին Հայաստանում պետք է բնակեցվի մինչև 4 մլն մարդ: Սակայն սրանք լոկ խոսքեր են, քանզի արտագաղթը կայուն տեմպով շարունակվում է, և այն արդեն սպառնում է երկրի անվտանգությանը: Դրա մասին տեղյակ են Հայաստանի իշխանությունները: Պարզ է, որ արտագաղթի կանխման միակ ճանապարհը տնտեսության բարելավումն է: Սակայն տնտեսության բարելավումն առանց լայնամասշտաբ ներդրումների դատարկ խոսակցություն է, քանզի ներդրումներն են, որ բերում են աշխատատեղերի աճի, աշխատուժի պահանջարկի, առնվազն որոնց միջոցով էլ հնարավոր կլինի կանխել արտագաղթը: 

Հիշեցնենք, որ ընդամենը մեկ տարի առաջ ամենաբարձր մակարդակով հայտարարվեց, որ 2017 թվականին Հայաստանի ներդրումները կհասնեն մինչև 800 մլն դոլարի: Ներկա դրությամբ այս տարվա ներդրումների ծավալը կազմում է ընդամենը ...40 մլն դոլար: Նման տխուր իրավիճակ Հայաստանում երբևիցե չի եղել: Պարզ է, որ եթե ներդրումներ չկան, ապա տնտեսության վերելքի մասին խոսելն ավելորդ է: Իսկ առանց տնտեսական վերելքի Հայաստանում դեմոգրաֆիկ խնդիրները չեն լուծվի: Եվ ուրեմն բոլոր այն խոսակցությունները, որ 20 տարի անց Հայաստանում կլինի մոտ 4 մլն մարդ, նման է հայտնի ասացվածքին. «Էշ մի սատկի, գարուն կգա»: Հանրության ճնշող մեծամասնությունը այս խոսքերը հենց այդ պրիզմայով է ընկալում:

Հակոբ Կարապետյան