«Հայաստանի և Ադրբեջանի միջև խաղաղության ապահովումը ժամանակի պահանջն է»․ Ալիև

«Պատմական փորձը ցույց է տալիս, որ հակամարտությունները չեն կարող հավերժ լինել»։ Այս մասին ասվում է Բաքվում ընթացող «Անվտանգություն և համագործակցություն. քաղաքական կուսակցությունների դերը» թեմայով Ասիական քաղաքական կուսակցությունների միջազգային համաժողովի (ICAPP) մասնակիցներին Ադրբեջանի նախագահ Իլհամ Ալիևի հղած ուղերձում։

«Ադրբեջանի և Հայաստանի միջև խաղաղության և անվտանգության ապահովումը, միջազգային իրավունքի և արդարության սկզբունքի հիման վրա, ժամանակի պահանջն է։ Այս տեսանկյունից ողջունելի են քաղաքական կուսակցությունների գիտելիքների և փորձի փոխանակումը, համագործակցության հնարավորությունների ընդլայնումը՝ միջազգային խաղաղությանն ու անվտանգությանը նպաստելու նպատակով»,- ընդգծել է Ալիևը։ 

Ալիևը նշել է նաև, որ ժամանակակից ժամանակաշրջանում «երբ ձևավորվում է նոր աշխարհակարգ, որն ուղեկցվում է միջազգային հարաբերությունների համակարգում լուրջ ցնցումներով, անհրաժեշտություն է առաջացել, որ քաղաքական կուսակցությունները և միջազգային կազմակերպությունները վերագնահատեն իրենց դիրքորոշումներն ու հնարավորությունները՝ ազդելու տարբեր իրադարձությունների վրա»:

Zham.am