Ադրբեջանը Ռուսաստանում լոբիստական կառույց է ձևավորում, իսկ ինչո՞վ է զբաղված Հայաստանը

Ադրբեջանն արդեն քանի տարի է, ինչ հետևողական աշխատանք է տանում Ռուսաստանում` սեփական լոբիստական կառույցներ ձևավորելու համար, հիմնականում հենվելով երկու խիստ հակահայկական հանրահայտ ռուս գործիչների վրա. խոսքը փիլիսոփա Ալեքսանդր Դուգինի և գրող Ալեքսանդր Պրոխանովի մասին է, ու թեև նրանք պետական պաշտոններ չունեն, սակայն ունեն մեծ ազդեցություն` ռուսական հասարակության  մի հատվածի վրա:

Եվ  ահա այսօր, սեպտեմբերի 14-ին կազմակերպվել է կոնֆերանս` "Մոսկվա - Բաքու` առանցք դեպի կովկասյան նոր քաղաքականություն" վերնագրով: Կոնֆերանսին մասնակցում են այնպիսի ազդեցիկ գործիչներ, ինչպիսիք են հայտնի տնտեսագետ Սերգեյ Գլազևը, ով լինելով Պուտինի խորհրդական ակտիվորեն քննադատում է Ռուսաստանում վարվող տնտեսական քաղաքականությունը, կոմունիստների առաջնորդ Գեննադի Զյուգանովը, պետդումայի այնպիսի ազդեցիկ գործիչներ, ինչպես` Ալեքսեյ Պուշկովը, Ֆրանց Կլինցևիչը, Լեոնիդ Կալաշնիկովը և այլն: Բնականաբար, կոնֆերանսի ակտիվ մասնակիցներից է ադրբեջանամետ քաղաքականագետ Սերգեյ Մարկովը: Ադրբեջանը ներկայացնում են իշխող ուժի ներկայացուցիչները և այն ընդդիմադիր շրջանակները, որոնք գործում են Իլհամ Ալիևի վերահսկողության տակ: 

Կոնֆերանսի գլխավոր առաքելությունը կայանում է նրանում, որ ռուս լայն հասարակությանը համոզեն, որ Ռուսաստանի բնական դաշնակիցը կարող է լինել ոչ թե Հայաստանը, այլ` Ադրբեջանը: Նշենք նաև, որ պաշտոնական Բաքուն այդ ուղղությամբ աշխատում է հետևողականորեն և բոլոր ուղղություններով. աշխատանքը տանում է ոչ միայն քաղաքագետների և քաղաքական գործիչների հետ, աշխատում է նաև ռազմաարդյունաբերական ոլորտի ներկայացուցիչների հետ, զինվորականների հետ: Ըստ որոշ տվյալների, այդ ուղղությամբ Ադրբեջանի կաշառքը հասնում է մինչև 500 000 մլն. դոլարի: Չեն մոռանում նույնիսկ շոու- բիզնեսի ներկայացուցիչներին: Այս տարվա օգոստոսի սկզբին Բաքուն կազմակերպել էր "Жара" անունով մի երաժշտական փառատոն, որին հրավիրել էին  շոու - բիզնեսի ավելի քան 80 ներկայացուցիչ: Այսինքն, բացառությամբ հայկական ծագում ունեցող երգիչ - երգչուհիների, Ռուսաստանի ողջ շոու - բիզնեսը Բաքվում էր: Ադրբեջանի նպատակն է լայն հասարակական կարծիք ձևավորել Ռուսաստանում, որ Մոսկվայի ամենաբնական դաշնակիցը ոչ թե Երևանն է, այլ` Բաքուն: Ասյտեղ չեն էլ թաքցնում, որ մեծ հաջողության են հասել այդ ուղղությամբ, և շատ քիչ ոլորտներ են մնացել, որ իրենց բնորոշմամբ, պետք է ազատագրել հայկական գործոնի ազդեցությունից:

Իսկ ինչով է զբաղված Հայաստանի իշխանությունը

Հայաստանյան իշխանությունները որև է լուրջ օրակարգ ռուսների հետ չունեն, եթե իհարկե չհաշվենք այն ստանդարտ կապերը որը կան:Դրանք արդեն դարձել են հնամաշ և ոչինչ չասող, մանավանդ, որ ուժերի հաշվեկշռի փոփոխությունից հետո տարածաշրջանում նոր խնդիրներ են առաջացել, որի իմաստը Երեվանում լավ չեն հասկանում: Դրա համար էլ առաջացել է այս անորոշությունն ու անհասկանալիությունը Մոսկվայի հանդեպ, որն առկա է ոչ միայն հասարակուտյան մեջ, այլև իշխանության ամենա վերին օղակներում:

Սա է իրականութույնը: 

Արտակ Հակոբյան