Ինչո՞ւ Հայաստանը չունեցավ իր Մեհման Ալիևը

Երեկ Ադրբեջանական իշխանությունները որոշում կայացրեցին կալանքից ազատել Թուրան գործակալության տնօրեն Մեհման Ալիևին, ինչը ողջունեցին Միացյալ Նահանգներում և Եվրոպայում:

Փորձենք հասկանալ, թե ինչու էին ձերբակալել այս լրագրողին Բաքվի իշխանությունները:

Ինչպես հայտնի է, իշխանությունները մոտ 400 բնակարան են տրամադրել տարբեր ԶԼՄ-ներում աշխատող լրագրողներին և խմբագիրներին: Այդ բնակարանները յուրօրինակ վարձատրություն էին, որ այդ լրագրողները, իբր "անկախ" կարգավիճակով, աշխատում էին իշխանությունների օգտին: 

Նշենք, որ այդ բնակարաններից օգտվել էին ոչ միայն իշխանական լրագրողները, այլև, այսպես կոչված "ազատ", և նույնիսկ թունդ "ընդդիմադիր" լրատվամիջոցների աշխատողները: Այս ամենը մեր համար զարմանալի չէ, Հայաստանում էլ "ազատ" և խիստ "ընդդիմադիր" լրատվամիջոցները նույնպես նվերներ են ստանում իշխանություններից: Պարզապես այն կատարվում է գաղտնի ձևով: Ադրբեջանն այդ գաղտնի փուլը վաղուց անցել էր: Մյուս տարբերությունն էլ այն էր, որ Հայաստանյան կերակրատաշտակից օգտվում են հիմնականում խմբագիրները: Մինչդեռ լրագրողների մեծ մասը սոցիալապես լավ վիճակի մեջ չեն: Բայց այնուամենայնիվ մի հարցում Ադրբեջանը տարբերվեց Հայաստանից: Բանն այն է, որ իշխանական կաշառք առաջարկվել է նաև Մեհման Ալիևին, "Թուրան" գործակալության տնօրենին, բայց նա հրաժարվել է այդ կաշառքից: Իշխանությունները առաջարկել են Ալիևին լրագրողների ցուցակ տալ, որոնք կարող էին անվճար բնակարան ստանալ Ալիևի կողմից:

Մեհման Ալիևը դրանից էլ է հրաժարվել` նշելով, որ իշխանությունից նվեր ստացած լրագրողը այլևս չեն կարող անկախ գործել: Եվ միայն դրանից հետո են նրա վրա քրեական "գործ" հարուցել և կալանավորել: 

Ուշադրություն դարձնենք այն հագամանքի վրա, որ Հայաստանում Մեհման Ալիևի նման լրագրող այդպես էլ ի հայտ չեկավ: Եվ իշխանական գայթակղություններից ոչ ոք չհրաժարվեց: Դեռ ավելին, իրեն խիստ "ընդդիմադիր" հռչակած լրատվամիջոցներից մեկի խմբագիրը խոստովանում էր, որ նույնիսկ լողանում էր գովազդների մեջ: Հասկանալի է, որ գովազդների մեջ լողացնողը իշխանությունն էր: 

 Այս հարցում Ադրբեջանը Հայաստանից առաջ անցավ: Եվրոմիությունում, Միացյալ Նահանգնեիրում արդեն գիտեն, որ Ադրբեջանում կան սկզբունքային լրագրողներ, ընդ որում Մեհման Ալիևը այդ շարքում միակը չէ, մինչդեռ Հայաստանում լրագրողների 95 տոկոսը գտնվում են իշխանությունների վերահսկողության տակ և հաճույքով կատարում են իրենց պատվերները` չմոռանալով պարբերաբար գոռգռալ, որ իրենք շատ "անկախ են" և "ընդդիմադիր": Իսկ սա նշանակում է, որ Ադրբեջանը բարոյապես ինքնամաքրվելու առանձին վերցրած կղզյակներ ունի, ի տարբերություն Հայաստանի, ով ամբողջությամբ հայտնվել է այս կեղտի մեջ,  և չի երևում այն լույսը թունելի վերջում, որ Հայաստանի համար կբացի ապահով ապագան:

Արտակ Հակոբյան