Հռոմի պապը կոչ է արել Թրամփին վերանայել «երազողներին» աշխատանքի իրավունքից զրկելու որոշումը. Tert.am

Հռոմի պապ Ֆրանցիսկոսը մեկնաբանել է ԱՄՆ նախագահ Դոնալդ Թրամփի վերջին որոշումներից մեկը, որը վերաբերում է նախկին նախագահ Բարաք Օբամայի նախաձեռնությամբ շրջանառության մեջ դրված ու ապօրինի ներգաղթյալներին աշխատելու հնարավորություն տվող, առավելապես «Dreamers» («Երազողները») անվամբ հայտնի ծրագրի փակմանը:

Ինչպես նշում է The Guardian-ը, պոնտիֆիկոսն ասել է, որ «այդ երեխաների դեմ որոշում կայացնելն ու նրանց ընտանիքներից բաժանելը լավ պտուղ չի տա»: Նա կոչ է արել Թրամփին վերանայել իր որոշումը՝ ընդգծելով, որ ղեկավարը պետք է ամեն ինչ անի ընտանիքները միասնական պահելու համար:

«Եթե նա իսկապես հետամուտ է առողջ ընտանիքների պահպանման գաղափարին, ապա պետք է հասկանա, որ ընտանիքը կյանքի օրրանն է, որի միասնությունը պետք է պաշտպանվի»,-ասել է կաթոլիկների հոգևոր առաջնորդը Կոլումբիայից Վատիկան թռչելու ճանապարհին:

Հռոմի պապը մանրամասնել է, որ ծրագիրը փակելու հետևանքով կտուժի մոտ 800.000 մարդ, որոնք մանուկ հասակում ծնողների կողմից որպես ապօրինի ներգաղթյալ Միացյալ Նահանգներ են բերվել ու DACA ծրագրի շնորհիվ աշխատելու իրավունք ստացել:

«Հուսով եմ, որ նա կվերանայի իր որոշումը, որովհետև երբ լսում եմ ԱՄՆ նախագահի խոսքը, նա ներկայանում է որպես ընտանիքների աջակից»,-հավելել է Պապը:

Ինչպես ավելի վաղ հայտնել էր Tert.am-ը, «երազողներն» ԱՄՆ-ում բնակվող 11 մլն ապօրինի ներգաղթյալների ստվար մասն են կազմում: Նրանց մեծ մասը լատինամերիկացիներ են՝ հիմնականում Մեքսիկայից: «Երազողների» հիմնական մասն ապրում է Կալիֆորնիայում, մեծ խմբեր կան նաև Տեխասում, Նյու Յորքում, Իլինոիսում ու Ֆլորիդայում:

Դեռևս նախագահի թեկնածու եղած ժամանակ Թրամփը խոստացել էր նրանց բոլորին արտաքսել երկրից:

Daca ծրագրի աջակիցների խոսքով՝ դրանում ներառված մարդիկ թեև չեն ծնվել ԱՄՆ-ում, սակայն ամերիկյան կրթություն են ստացել, ինտեգրվել են ամերիկյան հասարակությանը, կյանքի մեծ մասն անցկացրել են Միացյալ Նահանգներում ու չնչին կապեր ունեն ծննդավայրի հետ: Մինչդեռ ծրագրի ընդդիմախոսները բերում են այն փաստարկը, որ ապօրինի ներգաղթյալները խլում են շարքային ամերիկացիների աշխատատեղերը:

Աղբյուրը` Tert.am