Ինչո՞ւ իշխանությունը կարճեց ՍԱՍ -ի Արտակի գործը

Հատուկ քննչական ծառայությունը ` ՀՔԾ-ն, որոշում է կայացրել ՍԱՍ-ի ձայնագրության փաստով հարուցված քրեական գործը կարճել` հետևյալ ձևակերպմամբ` "հանցակազմի բացակայության հիմքով": 

Հիշեցնենք, որ ապրիլի 13-ին խորհրդարանական ընտրություններից անմիջապես հետո հրապարակվեց մի ձայնագրություն, որի մեջ մի տղամարդ ներկաներին սպառնալով և ծաղրելով հորդորում էր աշխատել ՍԱՍ-ի սեփականատեր Արտակ Սարգսյանի օգտին: Այդ ձայնագրության հրապարակումից հետո այն գլխավոր դատախազի հանձնարարությամբ ուղարկվեց ՀՔԾ` հանգամանքները ստուգելու նպատակով: 

Ապրիլի 19-ին հարուցվեց քրեական գործ, և ահա պարզ դարձավ, որ գործը վերջնականապես կարճված է: Անշուշտ, ՍԱՍ-ի գործը այնքան ակներև էր բոլորի համար, որ իշխանությունները չէին կարող չհարուցել գործ: Մյուս կողմից, իշխանությունները կգնային ավելի ռադիկալ քայլի, եթե լիներ հասարակական և քաղաքական ճնշում այս հարցում: Սակայն ավաղ, ընտրություններն անցան հանգիստ, իսկ քաղաքական ընդդիմությունն իր բացակայությամբ հաստատեց իր վերջնական ավարտի մասին: 

Ինչո՞ւ պիտի այս պարագայում իշխանությունը պատժեր իր իսկ յուրայինին, մանավանդ որ այն, ինչ- որ արել էր Արտակ Սարգսյանը, համընդհանուր կատարվում էր ողջ Հայաստանով մեկ:

Այս քայլով իշխանությունը դե ֆակտո ապաքաղաքականացրեց ընտրական ինստիտուտը Հայաստանում, բայց դա քիչ էր, իշխանության ջանքերով այս ընտրական ինստիտուտի ընդունումը լեգիտիմացվեց քաղաքական վերնախավի մեծ մասի կողմից: Եվ այսպես, ամփոփենք թե մեկ կրակոցով ինչ խնդիրներ լուծեց իշխանությունը'

Առաջին

Վերջնականապես ապաքաղաքականացրեց երկրի ընտրական համակարգը, որով այլևս հնարավոր չէ քաղաքական ընտրություններ անցկացնել:

Երկրորդ

Ընտրության միջոցով վերջնականապես խաղից դուրս հանեց քաղաքական ընդդիմությանը:

Երրորդ

Ընտրական օրենսգրքի ընդունման խաղի մեջ ներքաշելով հիմնական քաղաքական խաղացողներին` նրանց փաստացի վարկաբեկեց, քանզի այս ընտրական օրենսգրքի կնքահայրը ոչ միայն ներկայիս իշխանությունն է, այլև այդ քաղաքական ուժերի մեծ մասը:

Այսքանից հետո ՍԱՍ-ի Արտակի գործը դարձավ յուրօրինակ մի փոքրիկ երևույթ, որը իշխանությունը միշտ իրեն պաշտպանելու համար  կոչում էր` արջի ծառայություն: Սակայն տվյալ պարագայում "արջին" դատում են այն դեպքում, երբ առաջանում է լուրջ քաղաքական հասարակաակն ընդվզում, եթե այդպիսի փաստ արձանագրվեր Հայաստանում, ապա հաստատ այս հարցում իշխանությունները կզոհաբերեին ՍԱՍ-ի արտակի եղբորը կամ էլ նույնիասկ իրեն` ՍԱՍ-ի Արտակին, եթե ընդվզումն ավելի մեծ լիներ: Իսկ երբ ընդվզումն ընդհանրապես գոյություն չունի, հարց է առաջանում, իսկ ինչո՞ւ իշխանությունը պետք է պատժի իր յուրայինին, մանավանդ որ յուրայինը կատարել է հենց այն, ինչ որ իրենից պահանջել է իշխանությունը:

Ահա թե ինչու իշխանությունը կարճեց  ՍԱՍ-ի Արտակի գործը:

Հակոբ Կարապետյան