«Այո՛, ստորագրել եմ հրաժարականի տակ, այն ժամանակ, որ ստորագրել էինք, հասել էին Սիսիանի սահման ու հիմա այդտեղ նստած են»․ ՔՊ-ի ընտրացուցակով առաջադրված Սիսիանի ավագանու անդամի թեկնածու

Սիսիան համայնքի ավագանու ընտրություններին առաջադրված՝ Արման Բաբաջանյանի «Հանուն Հանրապետության» կուսակցության ընտրացուցակը գլխավորող Սևակ Մուսաթյանն ընտրական հանդիպումներից մեկի ժամանակ՝ տարակուսանք հայտնեց, նշելով, որ «Ժամանակին վարչապետի հրաժարականի տակ էին ստորագրում, հիմա «Քաղաքացիական պայմանագրի» ցուցակում են», գրում է Aravot.am-ը:

Ըստ երևույթին, խոսքը վերաբերում է Սիսիանի ավագանու դեռևս գործող անդամ Գևորգ Գևորգյանին, որը 2020 թվականի դեկտեմբերի 5-ին, ի թիվս ավագանու այլ անդամների պահանջել է վարչապետ Նիկոլ Փաշինյանի հրաժարականը։ Գևորգ Գևորգյանը Սիսիանի ավագանու անդամի ընտրություններին առաջադրված «Քաղաքացիական պայմանագիր» կուսակցության ընտրացուցակի 10-րդ համարն է։ «Այո՛, ստորագրել եմ հրաժարականի տակ, այն ժամանակ ուրիշ էր, հիմա՝ ուրիշ է։ Այն ժամանակ, որ ստորագրել էինք, հասել էին Սիսիանի սահման ու հիմա այդտեղ նստած են։ Բայց ստորագրելուց հետո տեսա, թե ովքեր են ուզում գալ իշխանության գլուխ՝ իմ կարծիքը փոխվել է»,-Aravot.am-ի հետ զրույցում ասաց ավագանու անդամի թեկնածու Գևորգ Գևորգյանը։

Աղբյուրի հաղորդմամբ՝ Սիսիանի համայնքապետարանի կայքէջում, Գևորգ Գևորգյանը ներկայացված է որպես անկուսակցական։ Սեպտեմբերի 25-ին կայանալիք Սիսիանի ավագանու անդամի ընտրություններին առաջադրված «Քաղաքացիական պայմանագիր» կուսակցության ընտրացուցակում Գևորգյանը կենտրոնական ընտրական հանձնաժողովի կայքում տեղադրված ցուցակում նշված է որպես «Քաղաքացիական պայմանագիր» կուսակցության անդամ։ «Ո՛չ, չգիտեմ դա ինչպես է ստացվել, ես անկուսակցական եմ»,–ասաց նա։

Նյութն ամբողջությամբ՝ սկզբնաղբյուր կայքում: