Թուրք պատմաբան Թաներ Աքչամն արժանացել է «Աշխարհն առանց ցեղասպանության» կազմակերպության պատվավոր մրցանակին. Մամուլ

Թուրք պատմաբան Թաներ Աքչամն արժանացել է «Աշխարհն առանց ցեղասպանության» (World Without Genocide) ոչ առևտրային կազմակերպության պատվավոր մրցանակին, այս մասին հայտնում է Ստամբուլի հայկական պարբերականներից «Ակօսը»:

Կազմակերպության ղեկավար Հելեն Քենեդին Աքչամին ուղղված նամակում հայտնել է, որ իրենք վաղուց են հիանում թուրք պատմաբանի խիզախությամբ, որն աշխատում է «Օսմանյան կայսրության կողմից հայերի դեմ իրագործված ոճրի հետ կապված հատուկ պատմական արխիվների հետ ու ներկայացնում դրանք հանրությանը»:

Քենեդին շեշտել է, որ չնայած թուրք ծայրահեղ ազգայնականների կողմից պարբերաբար ստացվող սպառնալիքներին՝ Աքչամը համառություն է ցուցաբերել շարունակելու իր գործը:

Ամիսներ առաջ Աքչամը կրկին Հայոց ցեղասպանության հետ կապված նոր արխիվային փաստաթուղթ է բացահայտել: Հրապարակված հեռագիրը կնքված է եղել Օսմանյան կայսրության՝ ժամանակի ներքին գործերի նախարարի հատուկ կնիքով, ինչպես նաև կոդավորված է եղել թվերով: Փաստաթղթում հատուկ կոդավորված են «հայ» և «տեղահանություն» բառերը:

Դրանից մեկ ամիս անց Աքչամը ևս մի փաստաթուղթ է հրապարակել: Ներկայացրած արխիվային փաստաթուղթը գրված է եղել թուրքական բանակի հրամանատարներից Մահմուդ Քյամիլ փաշայի կողմից և կրել է երկրի ներքին գործերի նախարարության կնիքը: Հայերին օգնող մահմեդականներին իրենց տան դիմաց կախաղանով սպառնացող Մահմուդ փաշան պահանջում էր տեղական ինքնակառավարման մարմիններից իրավիճակը պահել ուշադրության կենտրոնում:

Օսմաներենով գրված հեռագիրը տառադարձված է եղել նաև հայատառ թուրքերենով:

Թաներ Աքչամը մի շարք գիտական գրքերի հեղինակ է, որոնցից ամենահայտնին են «Թուրքական ազգային ինքնությունն ու Հայկական հարցը», «1915-ի գրությունները», «Հայերի բռնի իսլամացումը» և այլն:

Աղբյուրը` Tert.am