Համոզված եմ, որ մենք թույլ չենք տա չարակամներին սեպ խրել մեր երկրների և ժողովուրդների միջև. Միշուստինը՝ ԵԱՏՄ երկրների վարչապետների հանդիպմանը
Միջազգային հարաբերություններում բարդ ժամանակներ են, բայց ԵԱՏՄ պետությունները համակարգված արձագանքում են մարտահրավերներին` թույլ չտալով, որ իրենց տնտեսությունները փլուզվեն։ «ՌԻԱ Նովոստի»-ի հաղորդմամբ՝ այս հայտարարությունն արել է ՌԴ վարչապետ Միխայիլ Միշուստինը
«Միջազգային հարաբերությունների և արտաքին տնտեսական համագործակցության կառուցվածքը բավական բարդ փոփոխություններ է ապրում, ինչը պայմանավորված է նաև Արևմուտքի հավաքական գործողություններով»,-ասել է Միշուստինը Ղրղզստանի նախագահ Սադիր Ժապարովի և ԵԱՏՄ երկրների կառավարությունների ղեկավարների հանդիպմանը։
Նա նշել է, որ Եվրասիական տնտեսական միությունն ապացուցում է իր արդյունավետությունն ու կայունությունը դժվար իրավիճակում։
«Պատժամիջոցների պայմաններում մեր երկրների համար լրացուցիչ հնարավորություններ են բացվում, և ես կարծում եմ, որ այժմ շատ կարևոր է դրանցից գրագետ օգտվելը»,- ասել է նա։
Միշուստինը պարզաբանել է, որ խոսում է արդյունաբերական համագործակցությունն ուժեղացնելու, նոր, այդ թվում` բարձր տեխնոլոգիական նախագծեր գործարկելու մասին։ Դա թույլ կտա, որ ԵԱՏՄ-ն կախված չլինի ներմուծումից։
Ռուսաստանի վարչապետի խոսքով` անհրաժեշտ է բացառել միության շրջանակում համագործակցելու արհեստական խոչընդոտները և թույլ չտալ, որ նոր արգելքներ ի հայտ գան։
«Համոզված եմ, որ մենք թույլ չենք տա չարակամներին սեպ խրել մեր երկրների և ժողովուրդների միջև»,- հավելել է նա։
Հետևեք մեզ Facebook-ում