Կարծում եմ՝ այս ահաբեկչությունը Ալիև-Փաշինյան համատեղ պլանավորմամբ է կատարվել. Մետաքսե Հակոբյան

«Ես խոսել եմ բնակիչների հետ, ադրբեջանական կողմը կրակահերթ  է բացել բացառապես տեխնիկայի ուղղությամբ՝ ոչ մարդկանց, զոհեր, վիրավորներ չկան, իսկ ավերածությունների հետ կապված  ճշտումներ անում են Ներքին գործերի նախարարության աշխատակիցները  և ռուս խաղաղապահները: Պետք է սպասենք պաշտոնական տեղեկատվությանը: Այս պահին իրավիճակը խաղաղ է»,- ԼՈՒՐԵՐ.com-ի հետ զրույցում մանրամասներ հայտնեց  Արցախի Հանրապետության ԱԺ «Արդարություն» խմբակցության պատգամավոր Մետաքսե Հակոբյանը այսօր՝ ժամը 11:45-ի սահմաններում, Թաղավարդ և Կարմիր շուկա համայնքների ուղղությամբ մոտ 20 րոպե տևողությամբ  ադրբեջանական զինուժի  վարած  անկանոն կրակահերթի հասցրած վնասների մասին:  

Այն հարցին, թե ինչ հաղորդագրություն էր սա, նա պատասխանեց, որ  2020թ. նոյեմբերի 9-ից հետո ոչինչ չի փոխվել, իրենք չենք համարում, որ պատերազմն ավարտվել է կամ խաղաղություն է տիրում: 

«Քանի դեռ մեր հայրենիքի մեծ մասն օկուպացված է, վտանգը դրանից ավելի մեծ է, որովհետև իշխանությունների  բանաձևը՝ տարածքներ տանք, դրա դիմաց խաղաղություն ստանանք, չի աշխատում: Գոնե մենք այստեղ շատ լավ գիտենք, թե ով է մեր թշնամին և ինչ ակնկալիքներ ունի  ու հնարավոր չէ, որ կանգ առնի այս «ձեռքբերումով»: Եվ նոյեմբերի 9-ից հետո, եթե որևէ մեկը մտածում է, որ հրադադար է կամ խաղաղաություն կա, ասեմ, որ չկա նման բան, սա ժամանակավոր լռություն է, որը ժամանակ առ ժամանակ խախտվում է Թաղավարդ և Կարմիր շուկա համայնքների  և այն բնակավայրերի ուղղությամբ, որտեղ թշնամուն կարելի է անզեն աչքով տեսնել: Նման իրավիճակները սպասելի են, մշտապես անհանգստություն կա, որ թշնամին կարող է հաշվի չառնել, որ բնակավայրում երեխաներ, կանայք, մարդիկ են ապրում»,-հավելեց Մ. Հակոբյանը: 

Իսկ թե արդյոք կարելի է այս կրակահերթը կապել հայ-թուրքական հարաբերությունների կարգավորման ներկա փուլին հետ՝ որպես ճնշող գործոն, նա ասաց.

«Որքանով գիտեմ, սպասվում է Ալիև-Փաշինյան հանդիպում: Ցանկացած նման հանդիպումից առաջ, ընթացքում ու նաև հետո նման սադրանքներ լինում են,  և արդեն, անկեղծ ասած, մենք ավելի շատ հակված ենք մտածելու, որ նման ահաբեկչությունը կատարվում  է երկու կողմերի՝ Ալիև-Փաշինյան,  համատեղ պլանավորմամբ, որպեսզի հետագայում ինչ-որ հարցում կրկին զիջումների գնալու դեպքում պատճառաբանվի, որ դա արվեց մնացած մասը փրկելու համար»: