Ինչո՞ւ է Մութալիբովը հրապարակավ քծնում Մեհրիբան Ալիևային

Վերջերս Ադրբեջանի առաջին նախագահ Այազ Մութալիբովը հրապարակավ տեսակետ էր հայտնել, որ եթե Մեհրիբան Ալիևան իր թեկնածությունն առաջադրի գալիք նախագահական ընտրություններին, ապա ինքը, Մութալիբովը, կկանգնի նրա կողքին: Զարմանալին այն էր, որ Մութալիբովի այս հարցազրույցը լայնորեն տարածվեց ադրբեջանական մամուլում` ընդգծված դրական ֆոնով: Ոչ ոք հարցադրում չէր անում, թե ինչո՞ւ կենդանի Իլհամ Ալիևի պարագայում տիկին Մեհրիբանը պետք է առաջադրի իր թեկնածությունը, որին էլ այդպիսի ջանասիրությամբ աջակցում է Մութալիբովը:

Եթե Ադրբեջանում Մութալիբովի այս հարցազրույցը "չվերլուծվեց", ապա դա չի կարելի ասել թուրքական մամուլի մասին, որը Ադրբեջանի համեմատ ավելի ազատ է, և հիմնական ադրբեջանցի անկախ վերլուծաբանները հիմնականում հանդես են գալիս հենց թուրքական մամուլում: Եվ այստեղ էլ այն վարկածն են առաջադրում, որ հնարավոր է` ինչ - ինչ հանգամանքներից ելնելով գալիք նախագահական ընտրություններին Իլհամ Ալիևը չառաջադրի իր թեկնածությունը, և ըստ այդ վերլուծությունների հավանական է, որ Ալիևների կլանը որոշում կայացնի Ադրբեջանի նոր լիդեր դարձնել տիկին Մեհրիբանին: Եվ հաշվի առնելով այս հանգամանքը, իշխող կլանը մտահոգված է, որ այս տեղափոխումը կարող է ցնցումներ առաջացնել Ադրբեջանի լայն հասարակության շրջանում:

Իսկ Մութալիբովի արձագանքը անհրաժեշտ էր այնքանով, որ նա համարվում է ընդգծված ռուսամետ գործիչ, ով ապրում և գործում է Մոսկվայում, և ուրեմն նրա խոսքերով, Մոսկվան փաստացի աջակցում է Ալիևների կլանին: Իսկ Մոսկվայի աջակցությունը տիկին Մեհրիբանին անչափ կարևոր է Ադրբեջանի արքունիքում հնարավոր դավադրությունները կանխելու համար: 

Այստեղ մնացել է ընդամենը մեկ հարցական. ինչո՞ւ է ադրբեջանական կլանը հնարավոր համարում այս տեղափոխումը, որի վերաբերյալ փոքր - ինչ լույս է սփռում իսրայելական լրատվամիջոցների վերջին աղմկահարույց բացահայտումները` Ալիևների կլանի ներսում հաստատված իրավիճակի մասին:

Հակոբ Կարապետյան