Դրամի արհեստական արժեզրկումը լուծում չէ, լուծումը եզակի լինելն է. Մենք դեռ ճգնաժամի մեջտեղում ենք. ԿԲ նախագահ

Մենք գտնվում ենք մի ճգնաժամի միջնամասում, որը մեզ հետ չէր պատահել առնվազն վերջին 40-50 տարիների ընթացքում, ուստի գիտենք, որ կա գնաճ կոչվող մի երեւույթ, եւ նույնիսկ ԱՄՆ-ի նման երկրներում արձանագրվել է այնպիսի գնաճ, որը հավանաբար վերջին անգամ նրանց հետ պատահել է 1980-ականներին:

Այս մասին, այսօր՝ հունիսի 22-ին, Orion-2022 գագաթնաժողովի ժամանակ նշեց ՀՀ Կենտրոնական բանկի նախագահ Մարտին Գալստյանը: «Կենտրոնական բանկի մանդատն է ընդհանուր առմամբ տնտեսության համար ապահովել գների կայունություն և կանխատեսելի գների հետագիծ, և մենք օգտագործում ենք փոխարժեքը որպես գործիք։ Ես չեմ ուզում որպես հաճոյախոսություն ընդունել այն, որ մեր դրամը ամուր է, դա էկզոգեն գործոն է, որը տեղի է ունենում մեզ հետ՝ կապված Հայաստան օտարերկրյա այցելուների հետ: Դա պայմանավորված է նաև Հայաստանից արտահանման աճով»,-ասաց նա:

ԿԲ նախագահը նկատեց, որ այս օրերին Հայաստանում երեկոյան ռեստորաններում կարելի է տեսնել բազմաթիվ օտարերկրացիների. «Այդ ամենը, ըստ վիճակագրական կանոնների, պետք է գրանցվի որպես արտահանում, հետեւաբար, մենք ականատես ենք լինում արտահանման եւ ներմուծման անհավատալի աճի, ինչն էլ, բնականաբար, բերում է ազգային արժույթի արժեւորմանը։

Հիմա հանրության, հատկապես արտահանողների կոչն է՝ արհեստականորեն արժեզրկել հայկական դրամը, նրանք կոչ են անում Կենտրոնական բանկին միջամտել ու արժեզրկել հայկական դրամը, ինչը, հավանաբար, պետք է օգնի հայ արտահանողներին ավելի մրցունակ լինել դրսում։ Բայց արդյո՞ք դրամի 5-10% արժեզրկումն այն խթանն է, որին անհրաժեշտ է հայ արտահանողներն արդյունավետ լինելու համար։ Իմ պատկերացմամբ, դա լուծում չէ, լուծումը եզակի լինելն է:

Այսպիսով, եթե մենք ուզում ենք եզակի լինել, կան մի քանի բաներ, որոնք մենք պետք է անենք միասին, այնպես որ ես հույսս չդնեմ միայն արհեստականորեն արժեզրկված փոխարժեքի վրա՝ որպես մեր ինովացիոն քաղաքականության գործիք»,-հայտարարեց Մարտին Գալստյանը: