Համաձայն եմ, որ պարտված ղեկավարը պետք է հեռանա, բայց մենք չենք պարտվել, կամ պարտությունը միայն մեր մեղքով չէ. Աղազարյան
Մեր ընդդիմադիր գործընկերները տեսնելով, որ չեն հասնում այն իրողությանը, որը կցանկանային՝ իշխանափոխության, որոշեցին ազատել Ֆրանսիայի հրապարակ: Այս մասին այսօր՝ հունիսի 15-ին, ԱԺ-ում լրագրողների հետ զրույցում նշեց «Քաղաքացիական պայմանագիր» խմբակցության պատգամավոր Հովիկ Աղազարյանը:
«Դրանով հիմնավորվեց, որ իշխանության կուրսը ժողովրդի լայն շրջնակներում հավանության է արժանացել, ինչը դրական եմ համարում: Ի պատիվ ընդդիմադիր մեր որոշ գործընկերների սառնասրտության, ի պատիվ իրավապահ մարմինների ճշգրիտ գործունեության ու նաև իմ թիմակից գործընկերների հետևողական մոտեցման՝ մենք միասնաբար, որպես ազգ, նորից դուրս ենք գալիս ճգնաժամային իրավիճակից», - ասաց Աղազարյանը:
ՔՊ-ական պատգամավորը համաձայն է այն թեզի հետ, որ պարտված ղեկավարը պետք է հեռանա, բայց, նրա խոսքով, հիմա իրավիճակն այնպիսին է, որ իրենք չեն պարտվել, կամ՝ պարտությունը միայն իրենց մեղքով չէ:
«Հետևաբար, այդ թեզը չի աշխատում: Ընդդիմադիր մեր գործընկերներն անհանգստացած էին իշխանության կողմից վարվող քաղաքականությամբ։ Այդ անհանգստությամբ դուրս եկան ժողովրդին իրազեկելու, ժողովուրդը չանսաց, դա նշանակում է, որ ժողովուրդը վստահում է իշխանության վարած քաղաքականությանը: Վաղը այլ ուժեր կգան, նոր օրակարգով հանդես կգան, այդ ժամանակ էլ կխոսենք», - նշեց նա:
Հետևեք մեզ Facebook-ում