«Դաշինքը չի սահմանափակվի նշված երեք կուսակցություններով». Գեղամ Նազարյան

Vesti.am-ը քաղաքական գործընթացների, առաջիկա խորհրդարանական ընտրությունների և ձևավորվող դաշինքների մասին զրուցել է «Համախմբում» կուսակցության վարչության անդամ Գեղամ Նազարյանի հետ:

-Պարո՛ն Նազարյան, երեկ հայտարարություն տարածվեց, որ երեք քաղաքական ուժեր՝ «Համախմբում» «Երրորդ հանրապետություն» և Հայաստանի դեմոկրատական կուսակցությունները առաջիկա խորհրդարանական ընտրություններին մասնակցելու են միասնական դաշինքով: Որքանո՞վ եք հնարավոր համարում նոր քաղաքական ուժերի միավորումն այդ դաշինքին:

Հնարավորությունը մեծ է և կարծում ենք, որ նոր ուժեր, հայտնի անհատներ, հասարակական կազմակերպություններ կմիանան այս դաշինքին և այն կդառնա ավելի ընդգրկուն՝ ավելի մեծ հեղինակություն ունեցող մարդկանցով և գործիչներով: Դաշինքը չի սահմանափակվի նշված երեք կուսակցություններով:

-Ձեր ասածը ցանկություններ ե՞ն, թե կոնկրետ գործողություններ են արվում այդ ուղղությամբ:

Նախ և առաջ դրանք ցանկություններ են: Սակայն ցանկություններն ունեն հիմք և դրանք բանակցություններն են, շփումները, ամենօրյա աշխատանքները: Դաշինքը հասարակության համար ավելի ընկալելի, վերջնական տեսքով հանդես կգա առաջիկա մեկ-երկու շաբաթվա ընթացքում:

-Քաղաքականություն վերադառնալու մասին երեկ հայտարարություն արեց նաև Գագիկ Ծառուկյանը: Նա նշեց, որ լայն համախմբում է ակնկալում իր շուրջ: Ինչպե՞ս եք վերաբերվում այդ հայտարարություններին և այդ համախմբմանը:

Գնահատում ենք դրական: Մենք ողջունում ենք քաղաքական դաշտի ցանկացած ակտիվություն, որը կնպաստի Հայաստանի զարգացմանն ու քաղաքական դաշտի կայացմանը:

-Վերջերս շատ են այն կարծիքները, որ որքան ընդդիմադիր դաշտում շատ լինեն խմբավորումները, դաշիքները, այնքան դա օգուտ կբերի իշխանական թևին: Այսինքն ընդդիմադիր դաշտը ցրվածության, մասնատվածության նախանշաններ է ցույց տալիս: Դուք համաձայն ե՞ք այդ կարծիքի հետ:

Իհարկե այդ գաղափարը կա և այն բավականին իշխող տեսակետ է դարձել, սակայն դասական իմաստով և իրականության մեջ բոլորը չեն կարող միավորվել նույն դաշինքում, դա անհնար է: Դա կարելի է համարել ուտոպիստական գաղափարախոսություն: Կան տարբեր գաղափարներ, մոտեցումներ ունեցող անհատներ և նրանց շատ դժվար է միավորել մի ընդհանուր դաշինքի մեջ: Սակայն կարծում եմ՝ եթե ստեղծվի մեկ-երկու լուրջ դաշինք, դա կնպաստի քաղաքական գործընթացների առողջացմանը: Մեր պետությունը երևի շատ երիտասարդ է, դրա համար էլ նման կարծիքներ լինում են: Պետք է բոլոր կարող ուժերն իրենց հնարավորությունները միավորեն, որպեսզի կարողանանք ապահովել ազատ, արդար և թափանցիկ ընտրություններ, կարողանանք խուսաափել ընտրակեղծիքներից, ընտրակաշառքներից: Այդ հարցում պետք է բոլորը միավորվեն՝ անկախ նրանից միասին են գնում ընտրության, թե՝ ոչ:

-Հանրության շրջանում կարծիքներ են պտտվում, և կարծես թե, հող է նախապատրաստվում ընտրությունները բոյկոտելու ուղղությամբ: Ինչպե՞ս եք վերաբերում ընտրությունների բոյկոտին ընդհանրապես, իսկ Հայաստանում` մասնավորապես:

Ընտրությունների բոյկոտը ձեռնատու կլինի միայն ինշխանություններին: Ընտրությունները պետք է լինեն խաղաղ ճանապարհով իշխանափոխության հասնելու միջոց: Եթե մենք բոյկոտում ենք ընտրությունը, նշանակում է մենք իշխանություններին ուղղակի նվիրում ենք առանց պայքարի, չարչարանքի հաղթանակ: Դա նրանց համար նվեր կլինի: Դա իշխանությունների երազանքն է, որ ընտրությունները բոյկոտվեն: Ամեն դեպքում պետք է մասնակցել ընտրություներին, ամեն ինչ անել ընտրակեղծիքներ թույլ չտալու համար: Յուրաքանչյուր մարդ պետք է հասկանա, որ իրեն տրվող ընտրակաշառքը թույն է, որն ինքը պետք է խմի և հետագայում տա իր երեխաներին:

Նշեմ նաև, որ լուրջ խախտում է կատարվել ընտրության օրվա նշանակման հետ կապված: Այն պետք է ավելի ուշ նշանակվեր՝ առաջնորդվելով Սահմանադրության անցումային դրույթներով, ինչը չի արվել: Այս հարցով առաջիկայում հանդես կգանք հայտարարությամբ:

-Իսկ դրանք որոշակի փոփոխություններ կբերե՞ն:

Ընտրության օրը փոխելու հիմքերը շատ են: Կարծում եմ՝ այդ հարցում մեզ այլ ուժեր և գործիչներ ևս կմիանան:

Vesti.am