Նիկոլի թմբուկը խփող դատավորը կքննի Նիկոլին երդում տված ավագ քննիչի միջնորդությունը Գերասիմ Վարդանյանին կալանավորելու մասին

Նիկոլ Փաշինյանի «դըմփ դըմփ հու»-ի թմբուկը զարկող Դավիթ Արղամանյանը, որին 2021-ին նշանակեցին դատավոր, այսօր ժամը 20։00-ին կքննի ՀՅԴ անդամ Գերասիմ Վարդանյանին կալանավորելու արդեն չորրորդ միջնորդությունը՝ հայտնում է Yerkir.am-ը։

Մակագրումը տեղի է ունեցել «ձեռքով» և ակնհայտ է, որ իշխանություններին լոյալ  դատավորի ընտրությունը պատահական չէ։

Դավիթ Արղամանյանն, ինչպես գիտենք, 2018 թվականի նոյեմբերի 24-ին, երբ Նիկոլ Փաշինյանը նախընտրական երթ էր անում Երևանում,  ոչ ավել ոչ պակաս, երթի թմբուկն էր զարկում։

Զավեշտն այն է, որ Գերասիմ Վարդանյանին կալանավորելու միջնորդությունն էլ ներկայացրել է ԱԱԾ քննչական դեպարտամենտի ՀԿԳ ավագ քննիչ Սուրեն Նավոյանը․ սա այն քննիչն է, որը 2018-ին, «Շիշ բռնողի» հրավերով, միացավ Փաշինյանի հեղաշրջմանն ու բեմից հավատարմության երդում տվեց առաջնորդին։ Այդ ելույթը վարձատրվեց քննչական բաժնի հասարակ ավագ քննիչից նրան դարձնելով ԱԱԾ քննչական դեպարտամենտի ՀԿԳ ավագ քննիչ։ Դեռ ավելին՝ նրա հորն էլ՝ Ռուբիկ Նավոյանին, որը քաղաքապետարանի աշխատակից էր, 2021 թ-ին դարձրին ՀՀ Գեղաքունիքի փոխմարզպետ։

Եվ ահա Սուրեն Նավոյանը Գերասիմ Վարդանյանի կալանքն ազատությամբ փոխելու դիմաց 60.000.000 ՀՀ դրամ գրավ է պահանջել, ինչն էլ Վարդանյանը չի վճարել պարզ պատճառով՝ այդքան գումար չուներ։

Ու չնայած նախորդ դատավորը բավարարել է այս գումարի դիմաց ազատ արձակելու որոշումը, Գերասիմ Վարդայանին դարձյալ կանչել են դատավարության՝ այս անգամ «թմբկահար» դատավորի որոշումը լսելու՝ ինչ պետք է լինի նրա ճակատագիրը այս անմարդկային չափի գումարը չմուծելու դեպքում։

Տպավորությունն ամբողջացնելու համար կցում ենք տեսանյութը, թե ինչպես դատավոր Դավիթ Արղամանյանն անգամ թմբուկն էր զարկում Նիկոլ Փաշինյանի ցուցումով։