Թիվ մեկ մեղավորը Փաշինյանն է, թող ձերբակալեն, հասկանանք՝ ի՞նչ է լինում. պատերազմում զոհված հերոսների ծնողները պահանջում են պատժել Փաշինյանին. Տեսանյութ

44-օրյա պատերազմում զոհված հերոսների ծնողները վրդովված են Նիկոլ Փաշինյանի՝ խորհրդարանում արված հայտարարությունից, պահանջում են պատժել Փաշինյանին:

«Փաստինֆո»-ի հետ զրույցում պատերազմում զոհված հերոս Արման Ազատյանի հայրը՝ Վիգեն Ազատյանը, որն ի աջակցություն հացադուլ հայտարարած պատերազմի մասնակիցներ Նվեր Կիրակոսյանի և Արթուր Ավագյանի՝ նստացույց է անում Ազատության հրապարակում, հայտնեց, որ ապրիլի 26-ին, ժամը 14-ին կհավաքվեն Մոսկվա կինոթատրոնին հարող Ազնավուրի հրապարակում, որտեղ կհայտարարեն իրենց հետագա անելիքները:

Ծնողները պահանջում են ձերբակալել Նիկոլ Փաշինյանին՝ իր հայտարարության համար.

«Նիկոլը ԱԺ ամբիոնից հայտարարեց, որ կարող էր կանխել պատերազմը, կլիներ նույն վիճակը՝ ուղղակի առանց զոհ, ո՞նց եք պատկերացնում, եթե ես հիմա հայտարարեի, որ սպանել եմ 3 հոգու, քանի րոպե կտևի ինձ ձերբակալելը, ուր է Փաշինյանի հայտարարության արձագանքը, թող ձերբակալեն, հասկանանք՝ ինչ է լինում»,-ասաց Վիգեն Ազատյանը:

Ըստ զրուցակցի՝ Փաշինյանի այս հայտարարությունը ինքնախոստովանություն է.

«Մենք վստահ էինք, որ այդպես է, բայց հայտարարությամբ ինքը խոստովանեց, այն ծնողներն էլ, որոնք կասկածում էին, լրիվ Փաշինյանին չէին մեղադրում, հիմա բոլոր էլ իրան են մեղադրում, ի՞նչ նախկին, ի՞նչ ներկա, համար մեկ մեղավորն ինքն է»,-ասաց Վիգեն Ազատյանը:

Իսկ թե ինչպե՞ս է գնահատում Արցախում ստեղծված իրավիճակը, Վիգեն Ազատյանն ասաց.

«Բավականին տխուր է իրավիճակն Արցախում, բայց Արցախը կարող է հանձնվել միայն, երբ մեզանից ոչ մեկը կենդանի չմնա, Արցախում մեր տղաների արյունն է»:

Մանրամասները՝ «Փաստինֆո»-ի տեսանյութում