Ռուսաստանում ինքնաթիռի սրահում հեռախոսի ու վերնահագուստի տեղափոխումը կարող է վճարովի դառնալ

Ռուսաստանի Դաշնության տրանսպորտի նախարարության ներկայացրած նոր ավիացիոն կանոնները ենթադրում են լրացուցիչ վճարներ վերնահագուստը, անձրևանոցը, նոութբուքը, բջջային հեռախոսը, ֆոտոխցիկն ու տեսախցիկն ինքնաթիռի սրահ անցկացնելու համար, եթե դրանց քաշը չի տեղավորվում անվճար ձեռքի ուղեբեռի քաշի մեջ, գրում է ria.ru-ն։ Միևնույն ժամանակ, նոր կանոնները ենթադրում են, որ ավիաընկերության կողմից հաստատված ձեռքի ուղեբեռի քաշը չպետք է 5 կգ-ից պակաս լինի։

Առաջվա պես անվճար կարելի է ինքնաթիռի սրահ տանել կանացի պայուսակ, մանկական սնունդ ու կոստյում:

Հետադարձ տոմս գնած ուղևորները կկարողանան իրենց հետ անվճար վերցնել 10կգ-ից ոչ պակաս ուղեբեռ: Միևնույն ժամանակ, ավիաընկերությունները պարտավոր կլինեն իրերի տեղափոխման վերաբերյալ նոր կանոնների մասին տեղեկացնել նախքան տոմսի գնումը:

Ենթադրվում է, որ առաջարկված նոր փոփոխություններն ուժի մեջ կմտնեն առանց հետադարձի ավիատոմս գնելու դեպքում անվճար ուղեբեռի անցկացման չեղարկման մասին օրենքի՝ Դաշնային խորհրդի կողմից հավանության արժանանալուց ու նախագահի ստորագրությունը ստանալուց հետո:

Ավելի վաղ Դաշնային խորհրդի տնտեսական քաղաքականության և օրենսդրության հարցերով հանձնաժողովները չեն ընդունել փաստաթուղթը՝ նկատելով, որ վճարովի ուղեբեռի մասին օրենքը կարող է հանգեցնել տոմսերի գների թանկացման: Սակայն հետո տնտեսական քաղաքականության հարցերով հանձնաժողովն աջակցել է փաստաթղթի ընդունմանը:

Նշվում է, որ ավելի վաղ օրինագիծն ընդունվել է Պետդումայի կողմից:

Աղբյուր՝ Tert.am