«Եթե մահապատիժը վերականգնես՝ Գյուլենին քեզ չեն տա». պատգամավոր
Թուրքիայի քրդամետ Ժողովրդադեմոկրտական կուսակցության խոսնակ, Ուրֆայից ընտրված պատգամավոր Օսման Բայդեմիրը, խոսելով անցյալ տարի Թուրքիայում կայացած հեղաշրջման փորձի կազմակերպման համար մեղադրվող թուրք կրոնական քարոզիչ Ֆեթուլլահ Գյուլենի՝ ԱՄՆ-ից Թուրքիա արտահանձման մասին, նշել է, որ Թուրքիայի նախագահ Ռեջեփ Թայիփ Էրդողանը նման դեպքում չի կարող խոսել երկրում մահապատժի օրենքի վերականգնումից:
«Ե՛վ ասում ես արտահանձնեք, և՛ ասում ես՝ կկախեմ, կմորթեմ: Եթե մահապատիժը վերականգնես՝ Գյուլենին քեզ չեն տա», - ասել է Բայդեմիրը. գրում է թուրքական demokrathaber.org կայքը:
Հիշեցնենք, որ Թուրքիայում մահապատիժն օրինական կիրառություն ուներ մինչև 2004 թվականը, սակայն գործնականում այն չի կիրառվել 1984-ից ի վեր:
Մահապատիժը վերականգնելու մասին խոսակցություններն ու առաջարկները երկրում սկսեցին շրջանառվել 2016 թվականի հուլիսի 15-ին տեղի ունեցած ռազմական հեղաշրջման անհաջող փորձից հետո, որի ժամանակ ավելի քան 300 մարդ էր զոհվել, հազարավորները` վիրավորվել:
Հետևեք մեզ Facebook-ում