Մեր նպատակը Էրդողանին «գահընկեց» անելն է. Թուրքիայի ընդդիմություն

Թուրքիայի ընդդիմադիր Ժողովրդահանրապետական կուսակցության նախագահ Քեմալ Քըլըչդարօղլուն բրիտանական հեղինակավոր The Times պարբերականին տված հարցազրույցում հայտարարել է, որ աղմկահարույց «Արդարության քայլերթ»-ից ու շուրջ 2 մլն-անոց հանրահավաքաից հետո ընդդիմությունը պատրաստվում է շարունակել երկրում բողոքի ակցիաները իշխանությունների դեմ:

Քըլըչդարօղլուն նաև նշել է, որ իրենց նպատակը Էրդողանին «գահընկեց» անելն է:

Հիշեցնենք, որ օրեր առաջ Քըլըչդարօղլուն իրականացրել է մինչ այդ նախադեպը չունեցած և 25 օր տևած «Արդարության քայլերթ», որը սկիզբ էր առել մայրաքաղաք Անկարայից և ձգվել մինչև Ստամբուլ՝ շուրջ 450 կմ:

Քայլերթի ավարտին Ստամբուլի Մալթեփե շրջանում տեղի ունեցած «Արդարություն» խորագրով հանրահավաքին մասնակցել է ավելի քան 2 մլն քաղաքացի:

Թուրքիայի ընդդիմադիր Ժողովրդահանրապետական կուսակցության նախաձեռնած ու Անկարայից Ստամբուլ ձգված «Արդարության քայլերթը» տևել է ավելի քան 25 օր։

Քայլերթով երկրի գլխավոր ընդդիմադիր ուժը համարվող ժողովրդահանրապետականներն իրենց բողոքն են հայտնել կուսակցությունից պատգամավոր Էսին Բերբերօղլուի կալանավորման առնչությամբ, որին իշխանությունները մեղադրում են պետական գաղտնիքներ բացահայտելու և հանրայնացնելու համար և դատապարտել են 25 տարվա ազատազրկման:

Պատմական հանրահավաքի ժամանակ Քըլըչդարօղլուն և իր կուսակցությունը 10 կետանոց պահանջագիր են ներկայացրել երկրի իշխանություններին։

Աղբյուր