Որտեղ ուզում է լինի՝ կաթուցիչ որ տեսնում եմ, վերցնում եմ. Ներսես Պողոսյան

Aravot.am-ը գրում է․

«Ավան վարչական շրջանի ղեկավարի տեղակալ, ՔՊ-ական Ներսես Պողոսյանը Aravot.am-ի հետ զրույցում պարզաբանում է, թե որտեղից են իր գրպանում ոստիկաններն օրեր առաջ հայտնաբերել կաթուցիչ (պիպետկա):

Հիշեցնենք, որ ավելի վաղ Shamshyan.com-ը հաղորդել էր, որ ոստիկանության Էրեբունու բաժնի ծառայողները ուժեղացված ծառայության շրջանակներում Տիգրան Մեծի պողոտայից թմրամիջոց պահելու կասկածանքով Էրեբունու ոստիկանություն են բերման ենթարկել Ներսես Պողոսյանին եւ եւս մեկ քաղաքացու: Ներսես Պողոսյանից հետաքրքրվեցինք՝ ինչու է մոտը կաթուցիչ պահում:

«Մոտս կաթուցիչ չեմ պահում, հարցը եկեք այսպես գոնե ձեւակերպենք, ինչու է այդ պահին մոտս կաթուցիչ եղել կամ ոնց է մոտս հայտնվել, այդպես ավելի ճիշտ կլինի: Դեպքի առաջին օրը` զբոսնելուց գետնից վերցրել եմ ու հաճախակի, երբ քաղաքում տեսնում եմ փողոցով քայլելիս՝ որտեղ ուզում է լինի, նմանատիպ բան, որ տեսնում եմ՝ վերցնում եմ, գցում եմ աղբարկղը, որ երիտասարդի ու պատանու ձեռքում չհայտնվի: Այդ անգամ վերցրել էի ու մոռացել գցել: Շատ է պատահում, որ գրպաններիս մեջ նաեւ սիգարետի մնացուկ եմ հավաքում, որ ծխում եմ՝ աղբաման չի լինում, մնացորդը չեմ գցում գետնին, որովհետեւ էդ փողոցը մաքրում են տատիկներ ու պապիկներ, դրա համար վճարվում է բյուջեից: Կաթուցիչ մոտիցս հայտնաբերելը չի նշանակում թմրանյութ պահել:
Կաթուցիչը եղել է դատարկ, բայց օգտագործված»,- ասաց Ավան վարչական շրջանի ղեկավարի տեղակալը:

Նա չասաց, թե ով է ոստիկանություն իր հետ տարված քաղաքացին եւ արդյոք այդ քաղաքացին նույնպես թմրամիջոց պահելու կասկածանքով է բերման ենթարկվել ու նույնպես, ինչպես ինքը, փորձաքննություն անցել:

«Չգիտեմ, մենք առանձին ենք եղել ոստիկանական բաժանմունքում»:

Մեր զրուցակիցն ասաց, որ ինքը հենց նրա համար է հեղափոխություն արել, որ նաեւ պաշտոնյաները բերման ենթարկվեն: Իսկ մեր հարցին, թե ինչով եք կասկած հարուցել, որ ոստիկանները զննություն են կատարել ձեր գրպաններում, Ներսես Պողոսյանը պատասխանեց՝ ուժեղացված ծառայության ժամանակ է եղել, կանգնեցրել են մեքենան, որ ստուգեն: Փորձաքննության արդյունքները, ըստ մեր զրուցակցի, դեռ հայտնի չեն»: