Ռուսաստանի դեմ հնարավոր պատժամիջոցները կանրադառնան նաև Հայաստանի վրա. Moody's

Վարկանիշային ճնշումը հնարավոր է միայն այն դեպքում, եթե կոշտ պատժամիջոցները հանգեցնեն ռուսական տնտեսության զգալի տեմպերի դանդաղեցման կամ էներգակիրների մատակարարումների լուրջ խափանման։

Ուկրաինայի սահմանի երկայնքով ռուսական զորքերի առկայությունը մեծացնում է երկու երկրների միջև լարվածության սրման և Ռուսաստանի դեմ արևմտյան նոր պատժամիջոցների վտանգը։ Հայտարարել է Moody's վարկանիշային գործակալությունը` միաժամանակ կանխատեսելով, որ այդ իրավիճակը կարող է բացասաբար ազդել ԱՊՀ երկրների` Ռուսաստանի հետ տնտեսական, ֆինանսական և էներգետիկ կապերի վրա։

«Սակայն վարկանիշների համատեքստում ճնշումը հնարավոր է միայն այն դեպքում, եթե կոշտ պատժամիջոցները հանգեցնեն ռուսական տնտեսության զգալի տեմպերի դանդաղեցման կամ էներգակիրների մատակարարումների լուրջ խափանման»,-նշել է գործակալությունը` հավելելով, որ երկուսն էլ քիչ հավանական են համարվում։

Ընդ որում` ամենամեծ ռիսկերը կանխատեսվում են Բելառուսի, Ղրղզստանի, Տաջիկստանի, Մոլդովայի ու Հայաստանի համար։

Իր նախորդ կանխատեսման մեջ Moody's-ը նշել էր, որ միայն «ներխուժումը» կարող է հանգեցնել Ռուսաստանի սուվերեն վարկանիշի նվազման։

Fitch-ը ևս նշել է, որ Ռուսաստանի դեմ կոշտ պատժամիջոցները կարող են բացասական հետևանքներ ունենալ երկրի սուվերեն վարկանիշի և ռուսական բանկերի վարկանիշների համար։

Հիշեցնենք` վերջին ամիսներին Ռուսաստանի և Արևմուտքի հարաբերություններն ավելի են լարվել, վատթարացել Է Ուկրաինայի շուրջ ստեղծված իրավիճակը։ Վաշինգտոնն ու Բրյուսելը Մոսկվային մեղադրում են «ներխուժում» նախապատրաստելու մեջ՝ հայտարարելով, որ ռուսական զորքերը մոտենում են հարևան պետության սահմանին: Այս ֆոնին Հյուսիսատլանտյան դաշինքը ուժեղացնում է ներկայությունը Արևելյան Եվրոպայում և լրացուցիչ ուժեր ու զորակազմ ուղարկում այնտեղ։

Կրեմլը հերքում է բոլոր մեղադրանքները և պնդում, որ դրանք պատրվակ են դաշինքի ռազմական ներկայությունը ռուսական սահմանների մոտ ուժեղացնելու համար։

Աղբյուր՝ Sputnik Արմենիա