«Խաղաղության» ագրեսիվ քարոզչությունը շարունակվում է. Խաչատուր Սուքիասյանից հետո Էրդողանի ANADOLU-ն է խոսում է Թուրքիայի հետ սահմանի բացումից հետո «Գյումրիի բարգավաճման» մասին. Տեսանյութ

Հունիսի 9-ին, ելույթ ունենալով Գյումրիում նախընտրական հանրահավաքի ժամանակ, օլիգարխ Խաչատուր Սուքիասյանը գյումրեցիներին խոստացել է, որ ընդամենը մեկ տարի անց իրենց մոտ «անշարժ գույքի, հողի, ամեն ինչի գները բարձրանալու են, որովհետև Գյումրին շատ ինքնատիպ քաղաք է, դառնալու է ՀՀ այցեքարտը»: 

Նման խոստումներ տալով՝ Սուքիասյանն, իհարկե, իր խոսքերը պայմանավորում էր հայ-թուրքական սահմանի մոտալուտ բացմամբ։

Նա, ինչպես և իշխող կուսակցությունից շատ-շատերը, կարծում է, որ «թուրքական կապիտալը թույլ կտա երկիրին զարգանալ»։ Միևնույն ժամանակ չնկատելով (կամ հասկանալով, բայց նպատակաուղղված լռելով) այն ակնհայտ ճշմարտությունը, որ թուրքական կապիտալը չի ​​գա բարելավելու Հայաստանի սովորական բնակիչների կյանքը, թուրքական կապիտալն այստեղ պիտի լուծի աշխարհաքաղաքական խնդիր, որն ուղղակիորեն հակասում է Հայաստանի շահերին։ Բայց սա այլ խոսակցություն է: Կարևորն այն է, որ նույն Գյումրի և նույն թեզով ժամանել են թուրքական ANADOLU-ի լրագրողները, և նրանք, ինչպես ՀՀ իշխանությունները, «Թուրքիայի հետ խաղաղություն քարոզելու» ագրեսիվ քաղաքականություն են վարում։

Հոդվածում ասվում է, որ Գյումրիում փոքր բիզնեսի սեփականատերերը ANADOLU գործակալության թղթակիցներին տված հարցազրույցներում կիսվել են Թուրքիայի հետ հարաբերությունների վերականգնումից իրենց ակնկալիքներով։

Արտուշ Եղիազարյանը կրթություն է ստացել Շվեյցարիայում և Մեծ Բրիտանիայում, իսկ չորս տարի առաջ վերադարձել է հայրենի քաղաք, որտեղ բացել է Herbs and Honey սրճարանը։

Սրճարանատերը դրական է անվանել Հայաստանի և Թուրքիայի միջև հարաբերությունների կարգավորման գործընթացը։ «Չնայած այն հանգամանքին, որ մենք ունենք պատմական լուրջ խնդիրներ Թուրքիայի հետ, երկխոսությունը և առևտրային կապերի զարգացումը նպաստում են տարաձայնությունների լուծմանը։ Եթե ​​կողմերը չքննարկեն խնդիրները, ապա դրանք անհնար կլինի լուծել։ Կարեւոր է կապեր հաստատել, շփվել։ Միևնույն ժամանակ, ես սխալ եմ համարում որևէ երրորդ կողմի ելույթը Երևանի և Անկարայի անունից»,- ասել է նա։

Եղիազարյանը վստահ է, որ նորմալացման գործընթացը դրական ազդեցություն կունենա տեղական տնտեսության վրա, և ավելի շատ զբոսաշրջիկներ կգան քաղաք։ «Որքան շատ այցելուներ, այնքան շատ ենք վաստակում, այնքան շատ ծրագրեր ենք իրականացնում»,- պարզաբանեց Եղիազարյանը:

Հայկական Գյումրիի և թուրքական Կարսի միջև սահմանի բացումից երկու երկրներն էլ կշահեն, վստահ է նա։ «Ես շատ եմ ուզում, որ երկխոսությունը զարգանա առանց երրորդ երկրների մասնակցության, ոչ ոք չպետք է խոսի մեր անունից և մեր փոխարեն լուծի մեր խնդիրները։ Եթե ​​նայեք հայերի և թուրքերի անցյալին, ապա պարզ է դառնում, որ մեր մշակույթները սերտորեն փոխկապակցված են եղել 500-600 տարի: Այսօր մենք պետք է դրականորեն օգտագործենք այդ ավանդույթները»,- ասաց նա։

Գյումրու հին վարսավիրանոցներից մեկի աշխատակից Նորիկ Տոնոյանն իր հերթին ասաց, որ եղել են իրադարձություններ, որոնք ազդել են երկու կողմերի վրա:

«Սխալ է ներկայիս իրավիճակը շարունակելը։ Դարերով չես կարող կռվել։ Առեւտուրը մերձեցնելու է ժողովուրդներին եւ բերելու է խաղաղություն»,- ասում է Տոնոյանը, ով աշխատում է Գյումրիում 1939 թվականից գործող «Lux Berber»-ում։

Ի դեպ, նկատեցի՞ք, որ թուրքական հոդվածը կրկնում է Ղարաբաղյան 44-օրյա պատերազմի ժամանակ Փաշիյանների ընտանիքին պատկանող թերթում արտահայտված այն միտքը, որ «Հայաստանը պետք է ինքն ուղիղ երկխոսություն վարի Թուրքիայի հետ»։

Zham.am