Վրաստանում «կանաչ անձնագիր» ունենալն այլևս պարտադիր չէ

Վրաստանի իշխանությունները չեղարկել են «covid-անձնագրերի» համակարգը, որոնք պահանջվում էին հասարակական վայրեր այցելելու համար, ճեպազրույցում հայտարարել է կորոնավիրուսի համակարգող խորհրդի օպերատիվ շտաբի ղեկավար Գիորգի Գիբրաձեն։

Ըստ նրա՝ Covid-ի անձնագրերը դեռ կպահանջվեն այն մարդկանցից, ովքեր ցանկանում են այցելել արտասահմանյան երկրներ։ Գիբրաձեն ավելացրել է, որ չնայած կորոնավիրուսի «Օմիկրոն» նոր շտամով զանգվածային վարակմանը՝ իրավիճակը վերահսկելի է։ Օպերատիվ շտաբի պետը հիշեցրել է նաև, որ վարակվելուց հետո բարդություններից ապահովագրվելու միակ միջոցը պատվաստումն է։

«Կանաչ անձնագիր»-ը կամ «covid-անձնագիր»-ը էլեկտրոնային փաստաթուղթ է, որը պարունակում է տվյալներ քաղաքացու կորոնավիրուսային կարգավիճակի վերաբերյալ՝ պատվաստման ամբողջական կուրսը, հիվանդության տևողությունը և ՊՇՌ թեստերի արդյունքները։ Վրաստանում դեկտեմբերի 1-ից գործում է «կանաչ անձնագրերի» համակարգը։ Հասարակական վայրեր, ռեստորաններ, ժամանցի և առևտրի կենտրոններ հնարավոր էր այցելել միայն QR կոդով։