ՌԴ պետական ​​պաշտոնյաները հերթով հրաժարվում են աշխատել Ղազախստանի նոր պանթուրքիստ ​​և հակառուս նախարարի հետ

Նախօրեին՝ հունվարի 12-ին, հայտնել էինք, որ ռուս-ղազախական հարաբերություններում սկանդալ է հասունանում Ղազախստանի Տեղեկատվության եւ սոցիալական զարգացման նախարարի պաշտոնում Ասկար Ումարովին նշանակելու կապակցությամբ։

Ումարովը հայտնի է ոչ միայն ջերմեռանդ պանթուրքիստ լինելու հանգամանքով պայմանավորված, այլև ավելի եռանդուն հակառուսական գործիչ լինելու հանգամանքով։ Ավելին, նույնիսկ երբ նա փոխնախարար էր, Ռուսաստանը պաշտոնապես արգելեց նրա մուտքը իր պետական տարածք։ Ռուսական կողմի դժգոհությունն արտահայտվում է ոչ միայն տեղական ԶԼՄ-ների ու փորձագետների արձագանքով, այլեւ պաշտոնական մակարդակով։

Այսպես, «Россотрудничество»-ի ղեկավար Եվգենի Պրիմակովն արդեն հայտարարել է, որ «Россотрудничество»-ն չի աշխատի Ղազախստանի Տեղեկատվության նոր նախարարի հետ։

««Россотрудничество»-ն կապեր չի պահպանում, չի աշխատում և չի համագործակցում ռուսաֆոբ աղբի հետ, ինչը լիովին կանխում է մեր ցանկացած փոխգործակցությունը վերոնշյալ նախարարի և նրա ղեկավարած տեղեկատվության նախարարության հետ ներկայիս կոնֆիգուրացիաներում», - գրել է Պրիմակովը։

Հունվարի 12-ի երեկոյան «Роскосмос»-ի ղեկավար Դմիտրի Ռոգոզինը նույնպես արձագանքել է Ումարովի նշանակմանը։ Ռոգոզինի խոսքով՝ Ասկար Ումարովին գրկաբաց չեն դիմավորի Բայկոնուր տիեզերակայանում։ «Մենք նրան այնտեղ չենք սպասում»,- շեշտել նա։

Ինքը՝ Ումարովը, իր հերթին նշել է, որ ինքն անձամբ հավատարիմ է «ժողովուրդների հանդուրժողականության և բարեկամության սկզբունքներին», և իր գերատեսչությունը ծրագրում է «լավ սիներգիա ստեղծել ռուսական և այլ լրատվամիջոցների հետ»:

Փաստն այն է, որ Ռուսաստանը մի կողմից օգնեց նախագահ Տոկաեւին պահպանել պետության ղեկավարի պաշտոնը, մյուս կողմից՝ նման ոչ բարեկամական նշանակում ստացավ նախարարների նոր կաբինետում։ Սրան պետք է ավելացնել ռուսական մի շարք լրատվամիջոցների հրապարակած այն տեղեկությունը, որ ՀԱՊԿ խաղաղապահներին թույլ չեն տվել հսկողության տակ առնել Ալմա-Աթայում տեղակայված ամերիկյան կենսաբանական լաբորատորիաները։

Սեւակ Դանիելյան