ՔՊ-ն փորձում է վերահսկել ԱԺ հանձնաժողովների նախագահների և նախագահների տեղակալի ընտրության հարցը.Արթուր Ղազինյանի փոխարեն այլ թեկնածու կարող է առաջադրվել

«Քաղաքացիական պայմանագիր» խմբակցությունը ցանկանում է «իր ձեռքը վերցնել» նաև ԱԺ հանձնաժողովների նախագահների և տեղակալի ընտրության հարցը: 

ՔՊ-ն որևէ կերպ չի համակերպվում հատկապես ԱԺ պաշտպանության և անվտանգության հարցերի հանձնաժողովի փոխնախագահի պաշտոնում ընդդիմադիր պատգամավոր Արթուր Ղազինյանի թեկնածության հետ:

Հիշեցնենք, որ ԱԺ պաշտպանության ու անվտանգության մշտական հանձնաժողովի նախագահի տեղակալի պաշտոնում «Հայաստան» խմբակցությունն առաջադրել է Արթուր Ղազինյանի թեկնածությունը, վերջինիս թեկնածությանը, սակայն ՔՊ-ն 16 անգամ չի ընտրել նրան հանձնաժողովի նախագահի տեղակալ։

Նախագծի հիմնական զեկուցող Վիլեն Գաբրիելյանը նախագիծը ներկայացնելիս նշեց՝ Աժ կանոնակարգ սահմանադրական օրենքի 130-րդ հոդվածը սահմանում է ԱԺ մշտական հանձնաժողովների նախագահների և նրանց տեղակալների ընտրության կարգը, իսկ հոդվածի 10-րդ մասը սահմանում է, եթե մշտական հանձնաժողովի նախագահը չի ընտրվում, ապա իրավասու խմբակցությունը քվեարկությունից հետո 10-օրյա ժամկետում թափուր մնացած պաշտոնի համար առաջադրում է նոր թեկնածու, իսկ 11-րդ մասով սահմանվում է հանձնաժողովի նախագահի տեղակալ ընտրվում է իրավասու խմբակցության ղեկավարի կամ քարտուղարի առաջադրմամբ։ Մշտական հանձնաժողովի նախագահի տեղակալի ընտրությունը անցկացվում է հանձնաժողովի կազմը հաստատելուց, ինչպես նաև նրա պաշտոնը թափուր մնալուց հետո՝ 5 օրվա ընթացքում.

«Այս դեպքում սակայն պարզ չէ, թե ինչպես է կարգավորվում իրավիճակը, երբ հանձնաժողովի նախագահի տեղակալ չի ընտրվում: Օրենքն այս մասով ունի բաց: Մասնավորապես, ԱԺ պաշտպանության ու անվտանգության մշտական հանձնաժողովը տևական ժամանակ չի կարողանում ընտրել հանձնաժողովի նախագահի տեղակալ, իրավասու խմբակցությունը անընդհատ առաջադրում է նույն թեկնածուին, որին հանձնաժողովի անդամների մեծամասնությունը չի ընտրում, օրենքը չի կարգավորում այս դրույթը, տեղի է ունենում շահերի բախում»,-ասաց նա և հավելեց, որ իրավասու խմբակցությունն անընդհատ նույն թեկնածուին առաջադրելով չի կարող ստիպել պատգամավորին պարտադրված ընտրություն կատարել.

«Այս բացը չկարգավորելու հետևանքը կարող է դառնալ այն, որ ԱԺ ցանկացած հանձնաժողով կարող է բախվել խնդրի և ամբողջ գումարման ընթացքում չունենալ հանձնաժողովի նախագահի տեղակալ»,-ասաց պատգամավորը:

Վիլեն Գաբրիելյանը վստահեցրեց՝ նոր նախագիծը կկարգավորի ԱԺ հանձնաժողովի նախագահի տեղակալի ընտրության հարցը և կապահովի մշտական հանձնաժողովի աշխատանքի բնականոն ընթացքը:

Աղբյուր` Փաստինֆո