«ՔՊ»-ն վաղուց պետք է վերանվանվեր «Ադրբեջանական երազանք»․ Էդգար Ղազարյան
Այն, ինչ այսօր կատարվում է Հայաստանում, Ադրբեջանի երազանքն է։Այս մասին դեկտեմբերի 30-ին «Հայելի» մամուլի կենտրոնում ասաց Հայաստանի Սահմանադրական դատարանի աշխատակազմի նախկին ղեկավար Էդգար Ղազարյանը։
Նրա խոսքով՝ Ադրբեջանի քաղաքական ղեկավարությանը հաջողվել է համաձայնության գալ Հայաստանի ներկայիս վարչապետ Նիկոլ Փաշինյանի հետ։
«Պատկերացնենք, թե ինչ կլիներ եւ ինչպես կզարգանային իրադարձությունները Ղարաբաղում Հայաստանի լիակատար պարտության դեպքում։ Թուրքիան եւ Ադրբեջանը կներխուժեին Հայաստանի ինքնիշխան տարածք եւ որեւէ դիմադրության բացակայության դեպքում կգրավեին Երեւանը։ Այդ ժամանակ զավթիչները կկանգնեին հարցի առաջ՝ ո՞վ պետք է նշանակվի Հայաստանի նահանգի ժամանակավոր կառավարչի պաշտոնում։ Չեմ կարծում, որ Ադրբեջանի նախագահ Իլհամ Ալիեւին կհաջողվեր ավելի ընդունելի թեկնածու գտնել, քան Նիկոլ Փաշինյանը»,-ասաց Ղազարյանը։
Նրա խոսքով՝ Փաշինյանին, ըստ էության, այժմ հնարավորություն է տրվել շքեղ կյանքով ապրելու, ոչնչով չսահմանափակվելու, նաեւ սեփական թիմը կազմելու։ Մնացած ամեն ինչը նրան կթելադրեն Բաքվից։
«Փաշինյանին փաստացի դարձրեցին Հայաստանի ժամանակավոր կառավարիչ։ Սա նշանակում է, որ Ադրբեջանի քաղաքական ղեկավարությունը՝ ի դեմս Իլհամ Ալիեւի, որոշակի համաձայնության է եկել իշխող «Քաղաքացիական պայմանագիր» կուսակցության հետ։ Կարծում եմ, որ «Քաղաքացիական պայմանագիրը» վաղուց պետք է վերանվանվեր «Ադրբեջանական երազանք»,-ասաց Ղազարյանը։
Էդգար Ղազարյան
Հետևեք մեզ Facebook-ում