ՌԴ ԱԳՆ-ն կոչ է անում Անկարային և Երևանին հրաժարվել նախապայմաններից հարաբերությունների կարգավորման գործընթացում

Մոսկվան ողջունում է հարաբերությունների կարգավորման շուրջ երկխոսություն սկսելու՝ Հայաստանի և Թուրքիայի մտադրությունը, ինչը կբարելավի իրավիճակը ողջ տարածաշրջանում, այդ մասին ասել է ՌԴ փոխարտգործնախարար Անդրեյ Ռուդենկոն, հաղորդում է «РИА Новости»-ն։

«Հայ-թուրքական հարաբերությունների կարգավորումը, անկասկած, կնպաստի տարածաշրջանում ընդհանուր իրավիճակի բարելավմանը: Այս տեսանկյունից մենք ողջունում ենք երկկողմ երկխոսություն սկսելու պատրաստակամությունը, որը վերջերս ակտիվորեն դրսևորվեց Անկարայի և Երևանի կողմից: Մենք գոհունակությամբ ընդգծում ենք նրանց կողմից հատուկ ներկայացուցիչների նշանակումը՝ հարաբերությունների կարգավորման բարդ հարցը քննարկելու համար»,- ասաց Ռուդունկոն։

Ռուդենկոն հավելել է նաև, որ Ռուսաստանը պատրաստ է միջնորդ դառնալ, օգնություն ցուցաբերել «ցանկացած ձևաչափով» և կոչ է անում Անկարային և Երևանին հրաժարվել նախապայմաններից հարաբերությունների կարգավորման գործընթացում, կենտրոնանալ փոխադարձ ընդունելի թեմաների վրա, որոնք «կհանգեցնեն վստահության մթնոլորտի աստիճանական ձևավորմանը և բարիդրացիությանը»։

Zham.am